योजना उपभोक्ता समितिके पदाधिकारीनहे अभिमुखीकरण

पहुरा समाचारदाता
हसुलिया, १८ फागुन । कैलारी गाउँपालिकाके आयोजनामे योजना उपभोक्ता समितिके पदाधिकारीनहे योजना कार्यान्वयन सम्बन्धी एक दिने अभिमुखीकरण तालिम डेहल बा ।

वडा नम्बर ९ संचालन हुइल तालिममे कैलारी गाउँपालिकाके सामाजिक विकास शाखा प्रमुख यगम कलेल, योजना शाखा प्रमुख सन्तोषकुमार चौधरी ओ सव ओभरसियर निर्मल चौधरी सहजीकरण करल रहिट । कार्यक्रममे उपभोक्ता समितिके काम कर्तव्य अधिकार, आवश्यक कागजात, करकट्टी, सार्वजनिक सुनुवाई, अनुगमन, बजेट विनियोजन प्रक्रिया, संचालनबारे जानकारी डेहल बा ।

ओस्टेक योजना उपभोक्ता समितिके पदाधिकारीनहे हाल हाली योजनाके काम कैना निर्देशनफे डेहल बा । कार्यक्रममे जनता मावि गदरिया भवन निर्माण समितिके कोषाध्यक्ष गरिबदास चौधरी पहिलेसे काम मजा काम करल मने अपनहे फसाइक लाग कोशिस करल बटैलै । ओस्टेक और उपभोक्ताफे तालिमके बहुट बाट सिखल बटैलै ।
वडा अध्यक्ष खेमराज चौधरीके अध्यक्षतामे हुइल तालिमके समापन वडा सदस्य जगमा चौधरी करल रहिट । कार्यक्रममे वडा सदस्य, वडा सचिव ठागुराम चौधरी, उपभोक्ता समितिके पदाधिकारीहुकनके उपस्थिति रहल रहे ।