बडघर ऐन लागु कैना तीन पालिका इच्छुक
पहुरा समाचारदाता
धनगढी, १८ फागुन । कैलालीके जिल्लाके तीन स्थानीय पालिका बडघर ऐन लागु कैना इच्छुक डेखल बटै ।
आदिवासीहरुको मानव अधिकारका लागि वकिल समूह (लाहुर्निप) के टोली, थारु कल्याणकारिणी सभा, स्थानीयतहके जनप्रतिनिधिविच हुइल छलफल कार्यक्रममे कैलारी गाउँपालिका, भजनी नगरपालिका ओ जानकी गाउँपालिका बडघर ऐन लागु कैना इच्छुक डेखल हुइट । कैलारी गाउँपालिकामे हुइल छलफल कार्यक्रममे गाउँपालिका अध्यक्ष राजसमझ चौधरी वडघर ऐन पारित हुसेकल मने कार्यविधि बनैना बाँकी रहल बटैले बटै ।
उहाँ कहलै, ‘थारु समुदायभिटरके बडघर प्रथाके अलगे मुल्यमान्यता बा । पुर्खौसे न्याय कैना अलगे प्रणाली बा । यिहीसे न्यायिक समिति, अडडा अदालतहेफे सहयोग पुगल बा । कार्यविधि बनाके कुछ मुद्दाके कानूनी रुपमे फैसला कैना जिम्मा लगाई सेक्जाई ।’ पालिकामे ऐन बनसेकल ओरसे सक्कु जनहनसे छलफल करके कार्यविधि बनैना उहाँ बटैलै ।
कैलालीके जानकी गाउँपालिकाफे बडघर ऐन कार्य विधि बनासे गाउँपालिका गणेश चौधरी बटैलै । उहाँ कहलै, ‘ओम्ने कुछ बुँदा संशोधन करके राजपत्रमे प्रकाशित कैना बा । गाउँपालिकासे बडघर प्रणाली जोगैना तत्पर रहल गाउँपालिका अध्यक्ष बटैलै ।
ओस्टेक करके भजनी नगरपालिकामे हुइल छलफल कार्यक्रममे नगर प्रमुख केवल चौधरीफे बडघर ऐन नन्ना प्रतिबद्ध रहल बटैलै । उहाँ कहलै, ‘मै पहिलेसे बडघर ऐन नाने परठ कना पक्षमे रहुँ । पहिले उ आवाज उठागिल रहे । मने सुनुवाई हुइल । आब यी ऐन बारे छलफल आघे बह्रैना उहाँ बटैलै ।
जोशीपुर गाउँपालिकामे भर जनप्रतिनिधि विच छलफल नइहुइलेफे गाउँपालिका स्तरीय भलमन्साविच लाहुर्निपसे छलफल करल अध्यक्ष दिनेश घले बटैलै । बडघर ऐन संविधान, अन्तर्राष्ट्रिय कानूनसँग नइबाझना करके स्थानीयपालिकाहे ऐन नन्ना विषयवस्तुमे छलफल आघे बह्रैना सुझाव डेहल रहिट । थारु समुदाय भिटरके भलमन्सा प्रथा पुस्तौसे चल्टी आइल ओरसे यिही जोगाके रख्न आवश्यक रहलफे वहाँ बटैलै ।
जोशीपुर गाउँपालिकामे भलमन्सा सम्बन्धि ऐन बन्लेसेफे कार्यन्वयन भर हुई नइसेकल जोशीपुर गाउँपालिका स्तरीय भलमन्सा संयोजक शक्ताराम चौधरीके कहाई बा । उहाँ कहलै, ‘भलमन्सा ऐनके किताव जोशीपुर गाउँपालिकाभिटरके भलमन्साहे बुझाइल बा । उ ऐन जनप्रतिनिधिहुकनके लाग केल बा । भलमन्साहुकनके हकअधिकारके लाग नइहो । यम्ने बहुट बाट सुधारके लैजैना आवश्यक बा’ हकहितके लाग केल बा । भलमन्साहुकनके हकहितके लाग ऐन बनल नइहो ।
ओस्टेक भलमन्सासंगे चिरक्या, गुरुवा ओ सोरिन्ह्याहुकनके हकअधिकारहे समेटके कानून बनैना जरुरी रहल थारु कल्याणकारिणी सभा कैलालीके कार्यबाहक अध्यक्ष माधव चौधरी बटैलै । यी क्षेत्रके भलमन्सा, चिरक्या ओ गुरुवाहुकनहे कुछ दिन भिटरे भलमन्सा कानून ऐन सम्बन्धी तालिम डेनाफे उहाँ बटैलै ।
तीन पालिकामे हुइल छलफल कार्यक्रममे थारु अगुवा नागरिक समाजका संयोजक दिल बहादुर चौधरी, अधिवक्ता जोहारीलाल चौधरी, लाहुर्निपका दुर्गा यम्फु राई, पालिकाके उपाध्यक्ष, वडा अध्यक्ष, प्रमुख प्रशासकीय अधिकृतसेफे सहभागी रहे । कलेसे जोशीपुर गाउँपालिकामे हुइल छलफलमे जोशीपुर गाउँपालिका भरके करिव ५२ गाउँके भलमन्सा, समाजसेवी वुद्धिजिवी चुन्नीराम चौधरी लगायतके उपस्थिति रहे ।
