कैलारीके बसौटीमे भुटभुटाइल डगर निकारगिल
पहुरा समाचारदाता
हसुलिया, १९ फागुन । कैलालीके कैलारी गाउँपालिका–२ बसौटीमे भुटभुटाइल डगर शुकके रोज निकारगिल बा ।
वडा नम्बर २ के वडा कार्यालय, पूर्णगिरी यूवा ओ गाउँ समाजके पहलमे २०५४ सालके नक्सामे डेखल डगर निकारगिल हो । डगर क्षेत्रधिकारमे पर्ना जग्गा खाली कैडेना वडा कार्यालय ओ पूर्णगिरी समन्वय करके ३५ दिने सूचना प्रकाशित कैगिल रहे ।
वडा अध्यक्ष विकास चौधरी नक्सामे डेखल डगर क्लव ओ समाजके समन्वयमे निकारल बटैलै । उहाँ कहलै, २०५४ सालके नक्सामे डेखल पुरान डगर डेखल बा । पहिलेफे उ डगर हुइटी कुवाँमे पानी लेहे आवाट जावट कैजाए । पाछे डगरा सकिर हुइटी गैल रहे ।’
बसौटी गाउँमे अब्बे चार ठो डगरा निकारल उहाँ बटैलै । भुटभुटाइल डगराहे नयाँ साटके निकारेबेर जेसिबी ओ गाउँभरिक किसान मिल्के निकार उहाँ बटैलै । डगर निकारक लाग सक्कु जानेक समन्वय सहमति निकारल वडा अध्यक्ष बटैलै ।
बसौटी गाउँक भल्मन्सा खुशीराम चौधरी नक्सामे डेखल डगरहे निकारक लाग गाउँसे निर्णय अनुसार आघे बह्राइल बटैलै । उहाँ कहलै, सुरुमे कुछ विवाद हुइलेसेफे पाछे समझदारी काम आघे बह्रल बा ।
पूर्णगिरी यूवा क्लवके अध्यक्ष जनकराम चौधरी नक्सामे डेखल डगर निकारक लाग पहिले प्रसास हुइल मने आज आके सक्कु जानेक सहमति ओ सहकार्यमे काम आघे बह्रलै । उहाँ कहलै, ‘पहिलेफे कोडरा लेके डगर निकर्ना प्रयाय सुरु हुइल रहे । मने काम आघे बह्रल नइरहे । डगर सक्कु जानेक साझा हुइलक लाग ओरसे नक्साभिटर रहिट जेविसि प्रयोग करके काम आघे बह्रल हो ।’ डगरा निकर्नासे पहिले ३५ दिनेफे प्रकाशन करल उहाँ बटैलै ।
भौतिक संरचना रहल बसौटी गाउँक रामचरण चौधरी नक्सा डेखल डगरा डेहल बटैलै । उहाँ कहलै, मोरफे घारी कटल बा, नक्सामे डेखल डगराहे छोरगिल हो । हरिराम चौधरी पहिले सकिर डगर डेखल ओ नेंगल बटैठै । नक्सामे डेखल डगर रहे,’ उहाँ कहलै ‘गाउँसमाजके निर्णय करके निकारडेहल । गाउँसमाजमे मिले परठ कहिके डगर डेहल उहाँ बटैठै ।’
