जनप्रतिनिधिसंग एचआइभीमे हुई सेक्ना लाच्छना भेदभाव सम्बन्धी अन्तरक्रिया

पहुरा समाचारदाता
हसुलिया, १९ फागुन । कैलालीके कैलारी गाउँपालिकामे जनप्रतिनिधिहुकनसंग एचआइभीमे हुई सेक्ना लाच्छना, भेदभाव सम्बन्धी अन्तरक्रिया शुकके रोज हसुलियामे सम्मन्न हुइल बा ।

कैलारी गाउँपालिका स्वास्थ्य शाखाके समन्वयमे सुदूरपश्चिम प्रदेश सामाजिक विकास मन्त्रालय स्वास्थ्य निर्देशनालयके आयोजना कैलारी गाउँपापलिकाके अध्यक्ष राजसमझ चौधरीके अध्यक्षतामे कार्यक्रम हुइल हो । कार्यक्रममे बोल्टी उहाँ कैलारी गाउँपालिकामे २२ जाने एचआइभी संक्रमित रहल मने सक्कु जाने सम्पर्क नइआइल बटैलै । संक्रमितहुकनहे सेवा प्रदान पालिका सदैव तयार रहल बटैलै । एचआइभीमे हुई सेक्ना लाच्छना ओ भेदभाव हुई नइडेना जनप्रतिनिधिहुकनके जिम्मेवारी रहल बटैलै ।

कार्यक्रममे एएचएफके प्रोग्राम कोडनेटर माधव पन्त ओ सेभ द चिल्ड्रेनके सिनियर प्रोग्राम कोडनेटर प्रकाश लेखक एचआइभी एडसके अवस्था उपचार पद्धतिबारे प्रस्तुतीकरण करल रहिट । नेपालमे ३० हजार एचआइभी संक्रमित रहलमे २५ हजार सम्पर्कमे २३ हजार डवाई खैटी रहल ओ अभिन ५ लाख जाने लाच्छना लग्ना डरसे नुक्कके बैठल बटैलै ।
कार्यक्रममे सहजीकरण कैलारी गाउँपालिका स्वास्थ्य शाखाके प्रमुख नरेशकुमार चौधरी करल रहिट । गाउँपालिकाके सम्पर्कमे आइल संक्रमितहुकनके हकमे एक लाख रुप्याके स्वास्थ्य विमा करल उहाँ बटैलै । ओस्टेक अलगसे एक लाख रुप्या बजेट छुटयाके उपचारमे जउइयाहे यातायातके व्यवस्था समेट करल उहाँ बटैलै ।

कार्यक्रममे गाउँपालिकाके उपाध्यक्ष भगवतीकुमारी चौधरी, प्रमुख प्रशासकीय अधिकृत विरबहादुर ऐर, वडा अध्यक्ष, कार्यपालिका सदस्य, टमान शाखाके प्रमुख, कर्मचारी, सेवा प्रदायक संस्थाके प्रतिनिधिहुकनके सहभागिता रहे ।