आजसे होली टिहुवार सुरु
पहुरा समाचारदाता
धनगढी, २२ फागुन । एक आपसमे रङ लगाके उल्लासपूर्वक मनैना रङ्गोत्सव पर्वके रुपमे मनैना होलीके रहरङ्गी सुरु हुइल बा । बसन्तऋतु अन्र्तगत फागु पुर्णिमाके दिनसे मनैना होली पर्वके सुरुवाटसंगे लुग्गाकपराके फेन्सी पसलमे होलीमे घल्ना टीसर्ट टाँगल बा, कलेसे बजारमे अविर, रङ, पिच्काँरी विक्रीफे सुरु हुइल बा ।
धार्मिक ग्रन्थ विष्णुपुरानमे उल्लेख हुइल अनुसार ‘दैत्यराज’ हिरण्यकश्यपुके बहिनीया ‘होलिका’के नामसे यी पर्वके नामाकरण करल हो । ‘होलिका’ दहनके खुशीमे यी पर्व मनाई सुरुवाट कैगिल कहल बा । हिरण्यकश्यपु अपन दरबारमे विष्णुके पुजापाठमे प्रतिबन्ध लगैलै, मने हुकान छावा प्रलाहदभर नइमानके विष्णुके पुजा करलपाछे हुकहिके मुवैना योजना बनागिल रहे । आगीमे नइजरना ब्रहम्मासे बरदान पाइल होलिका अपन भतिजुवा प्रलाहदहे कोखमे लेके चारुओर पैरा लगायत जरना वस्तुके घेरा बनैली । ओम्ने आगी लगाई कहली । मने आगीसे होलिका जरली, प्रलाहद जिट्टी रहलै ।
असत्यके डगर लागल कहटी होलिकाके बरदान काम नइलागल कना जनविश्वास बा । ओ उहे तिथिहे होली पर्वके रुपमे मनाई लागल धार्मिक विश्वास बा । आपसी वैमनस्यताहे विस्राके एक दुसरसंग खुशी साटासाट करटी एकआपसमे सुख शान्तीके कामना कैना यी पर्वके विशेषता हो । होली पर्व सुख, शान्ती ओ आपसी सदभाव यकर खास उद्देश्य हो । गैरथारुहुक्रे होली पर्व दुई दिन मनैलेसेफे थारु समुदाय भर तीन मनैना चलन बा ।
पहिले थारु समुदाय सुरुके दिन अविर, दुसरा दिन रङ ओ टिसरा दिन हिलाकिचासेफे होली खेलित, मने आब भर हिलाकिचासे होली खेल्ना दिन ओराइल बा । थारुभिटरेफे रानाथारु ओ कठरियाथारु समुदायमे भर होली पर्व नम्माके मनैना चलन बा । होली पर्वमे उ समुदायके विशेष होरी रहठ, जौन घर–घर होरी नाँच करके होली खेल्टी रमैना चलनफे बा, ओम्ने उहाँहुकनके पहिचानफे जोरल बा ।
जिल्ला प्रहरी कार्यालय कैलालीसे होली पर्वमे जवरजस्ती रङ घस्ना ओ लोला मर्ना जैसिन क्रियाकलाप नइकैना आग्रह करले बा । पहाड होली फागुन २२ गते ओ तराईके जिल्लामे फागुन २३ गते मंगरके रोज परल होली पर्वमे रमाइलो तथा मनोरञ्जनके नाउँमे हुई सेक्ना उच्छृङ्गल तथा आपराधिक गतिविधि हुइना वा करे नइडेना सक्कुहुनके सुरक्षाके उपायमे ध्यान डेना जिल्ला प्रशासन कार्यालयसे आग्रह करले बा ।
पर्वके नाममे उच्छृङ्गल ओ अराजक गतिविधि हुई नइडेना सुरक्षा योजना लागू करल जिल्ला प्रहरी कार्यालय कैलालीके प्रमुख देवेन्द्र पाल जनैलै । पर्वहे मर्यादित रूपमे मनाई पर्ना कहटी इच्छा विपरीतके कार्य हुइलेसे प्रहरी कानुनी रूपमे प्रस्तुत हुइना उहाँ बटैलै । उहाँ कहलै, यहाँके मुख्य बजारके टमान क्षेत्रमे विशेष सुरक्षा जनशक्ति खटल बा । सडक चोक तथा सार्वजनिक स्थानमे मदिरा सेवन करके हो–हल्ला, समूहगत झैझगडा ओ क्षमतासे ढेर यात्रु रख्न विरुद्ध कारबाही हुई ।’
जिल्ला प्रशासन कार्यालय कैलालीके सूचना अधिकृत शिवराज जोशी पर्वके नाउँमे अवाच्छित गतिविधि नइकैना आग्रह करलै । केकरो इच्छा विपरित जथाभावी रङ नइघस्ना,लोलापानी नइछप्ना, डगरमे ढुकके बटुवाहुकनहे रङ लगैना, डगर अवरोध करके सवारी साधनसे रकम असुल कैना, मादक पदार्थ सेवन करके सवारी चलुइयनहे कार्वाही हुइना उहाँ आग्रह करै ।
