जहाँ विभेदरहित समाज वहाँ विकास गापा अध्यक्ष

पहुरा समाचारदाता
हसुलिया, २४ फागुन । कैलारी गाउँपालिकामे ११३ औं अन्तर्राष्ट्रिय महिला दिवस टमान कार्यक्रमके आयोजना कैके मनागिल बा ।

कैलारी गाउँपालिका महिला तथा वालबालिका शाखाके आयोजनामे हसुलियामे हुइल महिला दिवस कार्यक्रममे गाउँपाकिाके अध्यक्ष राजसमझ चौधरी महिला पुरुषविच विभेद हुइटसम विकास नइहुइना बटैलै । उहाँ कहलै, हम्रे डेखले बटी जौन देशमे विभेद बा, उ ठाउँमे विकास हुइल नइहो । नेपालफे पुरुष प्रधान देश हो । अभिनफे महिलाहुकनके पूर्ण अधिकार डेहे नइसेक्ले हो विकासके लाग विभेद मुक्त समाज बनैना आवश्यक बा ।’ जौन नेता महिला पुरुषविच भेदभाव करठ ओइनहे समाजसे बहिष्कार कैना उहाँ बटैलै ।

कार्यक्रममे गाउँपालिका उपाध्यक्ष भगवतीकुमारी चौधरी नारी पुरुष बराबर काम करे सेकठै मने विभेद काहे हुइठ कना प्रश्न करले बटी । लैङिक समानता सक्कु कहठी मने ओइसिन नइहुइल उहाँ बटैली । महिला सृष्टिकर्ता रहल कहटी महिला रुक्लेसे संसार रुक्नाफे उहाँ बटैली ।

वडा नम्बर ३ वडा अध्यक्ष सन्तराम चौधरी महिला पुरुष मिल्के गैलेसे केल सफल हुइना बटैलै । महिला डिडीबहिनीय आर्थिक रुपमे सक्षम नइहुइल कारण पाछे परल उहाँ कहलै । तालिम प्राप्त डिडीबहिनीयाहुकन सीपके सदुपयोग करके आघृ बह्रर्ना उहाँ आग्रह करलै ।

कार्यक्रममे वडा नम्बर ४ वडा सदस्य लालबहादुर विका, सरिता चौधरीलगायत मन्तव्य व्यक्त करल रहिट । कार्यक्रमके संचालन कैलारी गाउँपालिका महिला तथा बालबालिका शाखा प्रमुख बालकुमारी चौधरी करल रहिट । सम्मानित हुइलमे परम्परागत कुप्रथा अभ्यासहे निरुत्साहित करटी परिवारसे समुदायसम लैङिक भूमिका निर्वाह करुइया वडा नम्बर ५ के वडा अध्यक्ष विष्णु प्रसाद चौधरी, पहिल स्तानपन कक्ष व्यवस्थापन करुइया कैलारी गाउँपालिका–२ नम्बरके कार्यालय, उत्कृष्ट अर्गानिक कृषक वडा नम्बर २ के उजेली चौधरी, उत्कृष्ट कार्यसम्पादन करुइया वडा सचिव मञ्जु अधिकारी, महिला पेन्टर गुडिया चौधरी, राजमिस्त्री लिला चौधरी, उत्कृष्ट बालविकास सहजकर्ता चम्पा चौधरी सम्मानित हुइल बटै ।

ओस्टेक करके ११३औ अन्तर्राष्ट्रिय महिला दिवसके अवसर हुइल माध्यमिक विद्यालय स्तरीय वक्तृत्वकला प्रतियोगिताके विजेताहुकनफे पुरस्कार वितरण कैगिल बा । कैलारी गाउँपालिका महिला तथा बालबालिका शाखाके आयोजना तथा यी क्षेत्रमे क्रियाशिल सहकारी संस्था, गैर सरकारी संस्थाहुकनके समन्वयमे ‘लैङिक समानताके बलियो अधिकार, सृजनात्मक प्रविधिमे महिला पहुँचके विस्तार’ कना मुल नाराके साथ माध्यमिक विद्यालय स्तरीय वक्तृत्वकला प्रतियोगिता हुइल रहे । कैलारी गाउँपालिकाके टमान विद्यालयके २० जाने छात्रा, छात्र वक्तृत्वकला प्रतियोगितामे भाग लेहल रहिट ।

जेम्ने लक्ष्मी माविके पत्रिका ढुङगाना पहिल, राष्ट्रिय माविके प्रिति चौधरी दुसरा ओ दिपेन्द्र माविके रिता चौधरी टिसरा हुइल रहिट । प्रतियोगितामे पहिल, दुसरा ओ टिसरा हुइल विद्यार्थीनहे यिहे २४ गते महिला दिवसके अवसरमे पुरस्कृत कैगिल कैलारी गाउँपालिका महिला तथा बालबालिका शाखाके प्रमुख बालकुमारी चौधरी बटैली ।

कार्यक्रमके समन्वय ओरेक नेपाल, साहज नेपाल, सेतो गुराँस राष्ट्रिय बाल विकास सेवा, सामाजिक सेवा अध्ययन केन्द्र, बाल कल्याण संघ टिकापुर, पारदर्शी महिला बहुउद्देश्यीय सहकारी संस्था लिमिटेड, महिला उद्यमी सन्जाल, वडा नम्बर १ के कार्यालय रहल रहे ।

पवेरामे ११३औ अन्तर्राष्ट्रिय महिला दिवसमे सांस्कृतिक कार्यक्रम

ओस्टेक करके कैलारी गाउँपालिका वडा नम्बर ५ पवेरामे ११३औ अन्तर्राष्ट्रिय महिला दिवस सांस्कृतिक कार्यक्रमके साथ मनागिल बा ।

श्री चेतनशिल महिला विकास बहुउद्देश्यीय सहकारी संस्था लिमिटेडके आयोजना तथा वडा नम्बर ५ के कार्यालय, नव सृजना बचत तथा ऋण सहकारी संस्था लिमिटेड छोटी पलिया, सुनहरा कृषि सहकारी संस्था लिमिटेड, पवेरा साना किसान कृषि सस्था लिमिटेडके सहयोगमे हुइल कार्यक्रम हुइल हो ।

चेतनशिल महिला विकास बहुउद्देश्यीय सहकारी संस्था लिमिटेडके अध्यक्ष हिरा चौधरीके अध्यक्षतामे हुइल कार्यक्रमके वडका पहुना कैलारी गाउँपालिका वडा नम्बर ५ के वडा अध्यक्ष विष्णु प्रसाद चौधरी रहल रहिट ।
कार्यक्रममे वडका पहुना वडा अध्यक्ष विष्णु प्रसाद चौधरी भेदभाव मुक्त समाज निर्माण कैना सक्कु जानेक दायित्व रहल बटैलै । उहाँ कहलै, भारी सभा सम्मेलनमे महिला पूरुष बराबर हुइट । विभेदमुक्त बनैना भाषण केल नाही आब व्यवहारमे लागु करे पर्ना जरुरी रहल बटैलै ।

कार्यक्रममे वडा सदस्य अनारकली चौधरी, मनिराम कुमाल, भागुदास चौधरी, पवित्रा परियार, सडकपुरके विमला चौधरी, बैसपुरके चम्फा चौधरी, मनिकापुरके हिरा चौधरी,छोटी पालिकाके सेती चौधरी, गोबरैलाके इन्द्रा चौधरी, सुनिता चौधरी, जवदहुवाके धनपति चौधरी लगायत मन्तव्य व्यक्त करल रहिट ।

कार्यक्रमके संचालन चेतनशिल महिला विकास बहुउद्देश्यीय सहकारी संस्था लिमिटेडके सह व्यवस्थापन तिरथ चौधरी ओ स्वागत मन्तव्य सहकारीके उपाध्यक्ष सुशिला चौधरी करल रहिट । कार्यक्रममे वडा नम्बर ५ अन्र्तगतके सक्कु गाउँक सांस्कृतिक झाँकी डेखागिल बा ।

जेम्ने गोबरैलाके सखिया नाँच, पवेराके दिन नाँचुवा नाँच, होरी नाँच, मनिकापुरके सचेतनामुलक नाटक, सडकपुरके सखिया नाँच, जबदहुवा ओ वडका पलियाके झुम्रा नाँच, विसनपुरके सचेतनामुलक नाटक, बैसपुरके सखियाँ नाँच डेखागिल बा ।

ओस्टेक करके कैलारी गाउँपालिका–४ मे वडा स्तरीय महिला संजालके आयोजना महिला दिवस मनागिल बा । कलेसे कैलारी गाउँपालिका वडा नम्बर ८ के वडा कार्यालयके आयोजनामेफे महिला दिवस मनागिल बा ।