समाज परिवर्तनके बाहक ११ एकल महिलाहे सम्मान
पहुरा समाचारदाता
धनगढी, २७ फागुन । ११३ औँ अन्तर्राष्ट्रिय महिला दिवसके अवसर पारके मानव अधिकारको लागि महिला, एकल महिला समूह (डब्लूएचआर) सुदूरपश्चिम प्रदेशसे ११ जाने एकल महिलाहुकनके सम्मान करले बा ।
अपने एकल महिलाहुकेफे समाज परिवर्तनके लाग सामाजिक सेवा काम कैना ११ जाने एकल महिलाहुकनहे शुकके रोज एक कार्यक्रमके विच सम्मान कैगिल हो । सम्मानित हुइलमे सुदूरपश्चिम प्रदेश सभा सदस्य खेमा (माया) देवी बिष्टसहित, गौरीगंगा नगरपालिका–६ के पूर्व वडा अध्यक्ष कमला शर्मा, धना ओझा, लक्ष्मीदेवी चौधरी, सविता चौधरी,नारु खडका, चोहिया चौधरी, रम्भा कुवँर, मन्दोधरी भण्डारी, राधिका जोशी ओ रत्ना भण्डारी रहल बटै ।
सम्मानितहुकनहे कार्यक्रमके वडका पहुना प्रमुख पूर्व सामाजिक विकास राज्य मन्त्री टेक बहादुर रैका, विशिष्ट पहुना प्रदेशसभा सदस्य (माया) देवी बिष्ट, वडा अध्यक्ष धर्मराज ओझासे सम्मानपत्र ओ खादासे सम्मान करल रहिट ।
कार्यक्रममे बोल्टी वडका पहुना तथा सुदूरपश्चिम प्रदेशके पूर्व सामाजिक विकास राज्यमन्त्री टेकबहादुर रैका एकल महिनाहुकनके हिनता बोध त्यग्ना आग्रह करले बटै । एकल महिलाफे समाज परिवर्तनके लाग ढेर योग्दान करले बटै,’ उहाँ कहलै, ‘गाउँघरमे अभिनफे एकल महिलाहे हेर्ना दृष्टिकोण गलत बा । ओकर समाना करटी आघे बह्रना जरुरी बा ।’
सुदूरपश्चिम प्रदेश सभा सदस्य खेमादेवी बिष्ट चेतनाके कारण महिला पाछे परल कहटी अधिकार प्राप्तीके लाग आघे अइलेसे कोईफे रोक नइसेक्ना बटैली । अपनेफे एकल महिला हुके काल्हके दिनमे एकल महिलाके आवाजके लाग सडकसे आवाज बुलन्द पारल स्मरण करटी आब सदनसे आवाज उठैना उहाँ बटैली ।
एकल महिलाके हुइल कारण पहिले बोलेफे नइसेक्ना अवस्थामे रहु,’ उहाँ कहली,‘अब्बे प्रदेशसभा सदस्य हुके आइल बटु । मै फे एकल महिला हुके काल्हके दिनमे एकल महिलाके आवाजके लाग सडकसे आवाज बुलन्द करु, आब सदनसे आवाज उठैना प्रतिवद्धता जाहेर करटु ।’ एकल महिला डिडीबहिनीयाहुकनहे राज्यसे पाइल सेवाके सदुपयोग कैनाफे उहाँ आग्रह करली ।
धनगढी उपमहानगरपालिका वडा नम्बर ४ वडा अध्यक्ष बुद्धिबहादुर खडका एकल महिलाहुकनके योजना पास कैना नगरसमितिके सदैव पहल कैना बटैलै । उहाँ कहलै, वडा स्तरसे हुइना योजनाके लाग मै सदा प्रतिवद्ध बटु । महिला, दलित, जनजातीहुकनके हितके लाग वडा सकारात्मक बा ।’
वडा नम्बर २ के वडा अध्यक्ष धर्मराज ओझा एकल महिलाहुक्रे कृण्ठित हुके बैठनासे कुछ करके डेखैना आग्रह करलै । राज्य एकल महिलाहुकन सेवा प्रदानके लाग पहिल प्रथामिकतामे राखठ अवसरके खोजीके लाग कुछ न कुछ करही पर्ना उहाँ बटैलै ।
गौरीगंगा नगरपालिका–६ के पूर्व वडा अध्यक्ष कमला शर्मा अपने एकल महिला रहलेसेफे टिना खेती करके आघे बह्रल बटैली । आघेक कार्यकालमे वडा अध्यक्ष हुइल मने टिना खेती प्रमुख आम्दानी रहल उहाँ बटैली ।
सम्मान कार्यक्रमके अध्यक्ष तथा मानव अधिकारको लागि महिला, एकल महिला समूह (डब्लूएचआर) सुदूरपश्चिम प्रदेश अध्यक्ष सुमन शर्मा एकल महिला हुईबेर पाइल दुःख बिस्राकेफे घर बाहेर निकरके सामाजिक सेवामे काम करल कहटी ओइनहे सम्मानित उहाँ बटैली ।
उहाँ कहली, ‘एकल महिलाहे समाजसे हेर्ना दृष्टिकोण अभिनफे बदलल नइहो, ओसिन अवस्थामेफे यी जुझारु महिला सामाजिक क्षेत्रमे पुगाइल योगदानके कदर करटी हम्रे सम्मान करल हुई ।’ कार्यक्रमके सञ्चालन संस्थाके कैलाली अध्यक्ष भगवती हमाल ओ स्वागत मन्तव्य कोषाध्यक्ष मिना भण्डारी करले रहिट ।
