फेनसे टीयू टपर हुइलै एसपीएके विद्यार्थी

पहुरा समाचारदाता
धनगढी, ५ चैत । धनगढीके एसपीए कलेजमे बीआईएम अध्ययनरत् तीन विद्यार्थी सर्वोत्कृष्ट नतिजासहित त्रिभुवन विश्वविद्यालयके डुसरा ओ टिसरा टपर हुइल बाटै ।

त्रिभुवन विश्वविद्यालय(टीयू)से इहे बरस सावनमे लेहल बीआईएम (ब्याचलर अफ इन्फरमेसन म्यानेजमेन्ट) पहिल सेमिष्टरमे एसपीएके हेमबहादुर जोरा टीयू डुसरा ओ दीपेन्द्र जोशी तथा सौरभ प्रताप बम मल्ल टिसरा टपर हुइल हुइट । हेम ३.९१ जिपिए तथा दीपेन्द्र ओ सौरभ ३.९० जिपिएसहित टीयू टप हुइल हुइट ।

कलेजके बीआईएम कार्यक्रम निर्देशक इन्जिनियर भीमबहादुर पुन विश्वविद्यालयके प्रतिस्पर्धी परीक्षामे एसपीएके विद्यार्थीले टप कैना गर्विलो रहल बटैलै ।

‘टीयूके प्रतिस्पर्धात्मक परीक्षामे देशभरके विद्यार्थीहे उछिन्टी हमार विद्यार्थी अब्बल सावित हुइल बाटै । उहाँहुक्रनहे बधाई डेना चाहटुु,’ कार्यक्रम निर्देशक पुन कहलै, ‘इ नतिजासे शैक्षिक क्षेत्रमे एसपीए पुनः एकचो अब्बल रहल प्रमाणित हुइल बा । विद्यार्थीके अविरल मिहिनेत, अध्यापक तथा कलेजके साथ सहयोगसे इ सम्भव हुइल हो ।’

टीयू डुसरा टपर हुइल विद्यार्थी हेम निरन्तरके लगाव ओ अध्यापक तथा परिवारके साथ सहयोगसे सफलता मिलल बटैलै ।

‘पह्रके किल नैहोके व्यवहारिक रुपमे बुझके बह्रल ओरसे इ मेरके नतिजा आइल जैसिन लागल बा,’ हेम कहलै,‘मै पह्राइहे कबु नै बोझ मन्नु । मन लगाके पह्रुनु । कलेजमे फेन पह्रल चीजहे प्राक्टिकल्ली हुइना करल बा । इहीसे मजा कैना सहयोग करल हो ।’

आघेक अँठ्वार किल आइल बीएचएम पहिल सेमिस्टरमे फेन एसपीएके दुई विद्यार्थी टीयूके डुसरा ओ टिसरा टपर बनल रहिट । बीएचएमके देउमती चौधरी ओ एनी श्रेष्ठ फेन विश्वविद्यालय टप करल हुइट ।

गुणस्तरीय शिक्षाके लाग एसपीए पर्यायवाची शब्द जस्टे होसेकल अ‍ोरसे लगातार उत्कृष्ट नतिजा आइल क्याम्पस प्रमुख योगराज उपाध्याय बटैलै । एक हप्ताके दौरान आइल त्रिविका दुई महत्वपूर्ण कार्यक्रममे हमार विद्यार्थी टपर बनेबर हम्रे अन्त्यन्तै हर्षित बाटी,’ क्याम्पस प्रमुख उपाध्याय कहलै, ‘विद्यार्थीहुक्रनके लगाव ओ हमार प्राध्यापकहुक्रे उहाँहुक्रनहे अब्बल बनाइबर दिनरात करल मिहिनेतके फल आइल हो । टपरसहित उत्तीर्ण हुइल सक्कु विद्यार्थीनहे हार्दिक बधाई डेना चाहटु ।’