चैत २१ गतेसे गौरीगंगा गोल्ड कप आयोजना हुइना
पहुरा समाचारदाता
मसुरिया, ८ चैत । कैलालीके गौरीगङ्गा नगरपालिका–८ लिक्मामे टिसरा सुदूरपश्चिम गौरीगङ्गा गोल्ड कप २०७९ हुइना हुइल बा ।‘खेलौँ फुटबल रमेर, फुटबलको सन्देश, शान्ति स्थायित्व र एकताबद्ध देश’ कना नारा सहित गौरीगङ्गा–११ स्पोर्टस क्लबके आयोजनामे इहे चैत २१ गतेसे ३० सम प्रतियोगिता हुइना पत्रकार सम्मेलन मार्फत जानकारी डेहल हो ।
सुदूरपश्चिम प्रदेशके पर्यटन प्रवर्द्धन, नगर क्षेत्रहे खेलकुदके माध्यमसे चिन्हैना, व्यावसायिक खेलाडी बनैना तथा युवाहे खेलकुदमे लागक लाग अभिप्रेरित कैना उद्देश्यसे प्रतियोगिता करे लागल क्लबके अध्यक्ष दिनेश कलेल जानकारी डेलै ।
प्रतियोगितामे सुदूर पश्चिम प्रदेशके ९ जिल्लाके टीम ओ एक आयोजक सहित १० टिमके सहभागिता रहना जनाइल बा ।
प्रतियोगिताके विजेताहे ट्रफी सहित नगद ४ लाख ओ उपविजेताहे नगद २ लाख पुरस्कार ओ सर्वोत्कृष्ट खेलाडीहे नगद ५० हजार प्रदान कैना आयोजक जनैले बा ।
साथे सर्वाधिक गोलकर्ता, उत्कृष्ट गोलरक्षक लगायत अन्य विधाके खेलाडीहे नगद १० हजार पुरस्कार डेना जनाइल बा । कलेसे प्रतियोगिताके ‘म्यान अफ द म्याच’ हे नगद ५ हजार प्रदान कैना आयोजक जनैले बा ।
२०७४ सालसे खेलकुद ओ फुटबलके विकासके लाग ओ व्यावसायिक खेलाडी तथा खेलाडी उत्पादन ओ गाउँ घरके खेलाडीनके क्षमताके विकास एवं युवाहे खेलकुदमे लग्ना अभिप्रेरित कैनाके साथे फुटबल क्षेत्रके विकासके लाग प्रतियोगिता हुइटी आइल बा ।
गौरीगङ्गा गोल्ड कप खेल वडा नम्बर ८ स्थित लिक्माके खेल मैदानमे सञ्चालन हुइना जनाइल बा ।
