उद्घाटनमे एपीएफ ओ बागमती बिच प्रतिस्पर्धा
पहुरा समाचारदाता
धनगढी, ८ चैत । छैठौं संस्करणके मुख्यमन्त्री सुदूरपश्चिम खप्तड गोल्डकप फुटबल प्रतियोगिताके तयारी पुरा हुइल बा ।
बुधके साँझ धनगढी रंगशालामे पत्रकार सम्मेलनके आयोजना कैके आयोजक सुदूरपश्चिम–११ स्पोर्ट्स क्लव प्रतियोगिताके सक्कु तयारी पुरा हुइल जानकारी कराइल हो ।
चैत ९ गते दिनके ३ बजे सुदूरपश्चिमके मुख्यमन्त्री कमलबहादुर शाह प्रतियोगितके उद्घाटन कैना कार्यक्रम रहल बा । क्लवके महासचिव प्रकाश शाही उद्घाटन खेल नेपाल एपीएफ क्लव ओ बागमती क्लवबीच बिफेक रोज दिनके साढे तीन बजे हुइना बटैलै ।
प्रतियोगितामे ‘ए’ डिभिजन ६ टीम, दुई विदेशी टिम, मोसलके एक ओ आयोजक क्लव सहित १० टीमके सहभागिता रहल आयोजक जानकारी डेले बा ।
प्रतियोगिताके विजेता टोली २१ लाख ओ उपविजेता १० लाख रुपैयाँ नगद पुरस्कार प्राप्त कैना बाटै । ओस्टके, सर्वोत्कृष्ट खेलाडीहे एक लाख रुपैयाँ पुरस्कारके व्यवस्था करल बा ।
विधागततर्फ उत्कृष्ट खेलाडीहे जनही १५ हजार ओ म्यान अफ दि म्याचहे १० हजार रुपैयाँ पुरस्कार प्रदान कैना आयोजक जानकारी डेले बा ।
प्रतियोगिता २०७३ सालसे आयोजना हुइटी आइल बा । प्रतियोगितामे उद्घाटन खेल हेरक लाग टिकट नैलग्ना महासचिव शाही बटैलै । ओस्टके अन्य दिन विद्यार्थीके लाग एक सय ओ अन्यके लाग एक सय ५० रुपैयाँके टिकट लग्ना जनाइल बा । टिकट काटल मध्ये दैनिक एक जाने दर्शकहे गोलाप्रथासे एन्ड्रोइड मोबाइल फोन पुरस्कार पैना बाटै ।
क्लवके अध्यक्ष सुरेश हमाल सुरुके खेल खेलक लाग टीम आसेकल बटैलै । उहाँ सुदूरपश्चिममे आयोजना हुइना एकठो किल अन्तर्राष्ट्रिय प्रतियोगिता रहल ओरसे सक्कु जनहनहे आपन मानके सहयोग कैडेना आग्रह करलै ।
मुख्य प्रवद्र्धक रहल सुदूरपश्चिम प्रदेश खेलकुद परिषद्से चित्र भट्टके संयोजकके रुपमे पठाइल बा । परिषद्का सदस्य सचिव दिपकबहादुर सिंह निजि क्षेत्रहे पाछेक समय समय आर्थिक मन्दीसे परल असरके कारण प्रायोजक पैना मुस्किल रहल बेला सरकारसे आवश्यक सहयोग करलपाछे गोल्डकप हुइ लागल बटैलै ।
