प्रधानमन्त्री प्रचण्डसे उद्घाटन हुइना
पहुरा समाचारदाता
धनगढी, ८ चैत । धनगढीमे विश्व नेपाली नारी साहित्य महोत्सव हुइ जैटी रहल बा ।
सुदूरपश्चिमाञ्चल साहित्य समाजके आयोजनामे हुइ जैटी रहल महोत्सव इहे चैत १० से १३ गतेसम आयोजना हुइना जनाइल बा । महोत्सवके उद्घाटन प्रधानमन्त्री पुष्पकमल दाहाल प्रचण्डसे हुइना साहित्य समाजके अध्यक्ष तीर्थराज पाण्डेय बुधके पत्रकार सम्मेलन मार्फत जानकारी करैलै ।
तीन दिनसम सञ्चालन हुइना महोत्सवमे भारतके टमान राज्य, अमेरिका, भूटान, म्यानमार लगायतके देशसे दुई सयसे ढेर नारी साहित्य स्रष्टाहुक्रनके सहभागीता रहना अध्यक्ष पाण्डेय बटैलै ।
उहे अवसरमे विलक्षण प्रतिभाशाली बालिका प्रिन्सा रेग्मी, स्थापित समाजसेवी अनुराधा कोइराला, मधेसके मुर्धन्य साहित्यकार राजेन्द्र विमल, गजलकार तिलक पेला, अन्तर्राष्ट्रिय साहित्य समाजके अध्यक्ष पदम विश्वकर्मा (अमेरिका) फेन सहभागी हुइना जनाइल बा ।
समारोहमे विलक्षण साहित्यिक प्रतिभा झमक घिमिरेहे सम्मान कैना आयोजक जनैले बा । अध्यक्ष पाण्डेयके अनुसार साहित्यकार झमकहे एक लाख ११ हजार रुपैयाँ राशीके बद्रि–कृष्णा बाङ्गमय पुरस्कार प्रदान कैना जनैलै ।
महोत्सवमे हरेक दिन सुदूरपश्चिम प्रदेशके टमान समुदाय ओ क्षेक्रके मौलिक सांस्कृतिक कार्यत्रम समेत प्रदर्शन कैना जनाइल बा । महोत्सवके लाग झण्डे ८० लाख रुपैयाँ खर्च हुइना अनुमान करल बा ।
धनगढीमे २०७६ सालमे विश्व नेपाली साहित्य सम्मेलन ओ २०७८ सालमे नेपाली साहित्य सम्मेलन आयोजना होसेकल बा ।
