अत्तरियाके एक अस्पताल एक फार्मेसी शिल

पहुरा समाचारदाता
धनगढी, ११ चैत । कैलालीके अत्तरियाके दुई अस्पतालमे शील करल बा । शनिच्चरके रोज औषधि स्वास्थ्य विभाग नेपालगन्ज, सुदूरपश्चिम प्रदेशके सामाजिक विकास मन्त्रालय ओ जिल्ला प्रशासन कार्यालय कैलालीसे करल सयूक्त अनुगमनके क्रममे दुनु अस्पतालमे कैफियत फेला परल शीलबन्दी करल जिल्ला प्रशासन कार्यालय कैलालीके सूचना अधिकारी शिवराज जोशी बटैलै ।
अनुगमनके क्रममे कैफियत फेला परलपाछे अत्तरियाके नेहा फार्मेसी ओ सुदूरपश्चिमाञ्चल सामुदायिक हस्पिटल शिल करल उहाँ जनैलै ।

संयुक्त अनुगमन टोलीसे अत्तरिया ओ धनगढीके ८ औषधी पसलके अनुगमन करल रहे । अनुगमनके क्रमममे ढेर जैसिन औषधि पसल उचित मापदण्ड पुरा नइकरके सञ्चालन हुइल समेत पाइल जोशी बटैलै । अत्तरियामे रहल दुई हस्पिटलसे टे सामान्य मापदण्ड समेत अपनाइल नइपाइल ओरसे बन्द अर्थात शिलवन्दी करल उहाँ जनैलै ।

अनुगमनके क्रममे फार्मेसी दर्ता नइहुइल, नविकरण नइहुइल, सञ्चालक अनुपस्थित रहल, लागूऔषध तथा मानसिक रोगसम्बन्धीके औषधीके अभिलेखिकरण नइकरल लगायतके कमजोरी अनुगमनके क्रममे फेला परल रहे ।

सामाजिक विकास मन्त्रालयके योजना तथा जनस्वास्थ्य महाशाखा प्रमुख हेमराज खडकासे कैलालीके फार्मेसी तथा क्लिनिकबारे मन्त्रालयमे गुनासो बह्रे लागलपाछे बजार अनुगमन करल बटैलै । उहाँ कहलै, ‘बजार अनुगमन हुइलेसे फार्मेसी, क्लिनिक तथा अस्पतालमे हुइटी रहल कमीकमजोरी सुधार हइटी जाई । आब यिहीहे नियमित डेजाई ।’ उहाँ अनुगमनके क्रममे भेटल त्रुटिहे सच्यइना सुझाव डेहल बटैलै ।