परिवार ओ समाजमे सामान्य लग्ना विषयमे परिवर्तन नन्टी रुपान्तरण कक्षा
घनश्याम पौडेल
मसुरिया, ११ चैत । कैलाली जिल्ला कैलारी गाउँपालिका वडा नं ८ के बालबालिकाहुक्रे उमेरसंगे शारीरिक तथा मानसिक रुपमे अपनमे अइना समस्या ओ परिवर्तनके बारेमे घर परिवारमे खुलके बटाईबेर परिवारसे सहयोग ओ समाजमे सम्मान मिल्न करल बटैले बटै ।
अपनहे समस्या परेबेर विद्यालयमे संघरीयाहे सुनैना करल आयुष चौधरी रुपान्तरण कक्षामे सहभागी हुइलपाछे अपन परिवारके सदस्यहुकनहे अपने भोगे परल समस्या ओ आवश्यकता टे घरमे बताई परठ कना बुझलै । १६ बर्षके उमेरके उहाँ साप्ताहिक रुपमे संचालन हुइना रुपान्तरण कक्षामे सहभागी हुइलपाछेक अनुभव यैसिक कहलै “ मै विगतके दिनमे टमान बहानामे डाईसे जिद्दी करके मनलग्ना खर्च मग्ना करु अब्बे अतिआवश्यक कामके यथार्थ जानकारी डेके खर्च मग्ना करल बटु खर्च हुके बचल पैसा खुत्रुकेमे धरठु । यैसिक करलेबेर मोर बाबा डाईहे विश्वास करठै “ चौधरी बटैठै ।
अपन उमेर समुहके संघरीयाहे संघरिया शिक्षकके भुमिका निर्वाह करल निर्प बहादुर चौधरी “रुपान्तरण कक्षाके सिकाइसे सामाजिक कार्यके अगुवाइ करे पैलेसे वडासे विनियोजन करल दुई लाख रुप्याके योजनामे सचिवके जिम्मेवारी निर्वाह करेबेरके समय शब्दमे व्यक्त करे नइसेक्ना खुसी मिल्न अनुभव सक्कुहुनहे खुलके धारेबेर पैना जिम्मेवारी घर परिवारके साथ सहयोग ओ सामाजिक सम्मान मिलठ ।’
कैलालीके कैलारी गाउँपालिका वडा नं ८ के केवलपती चौधरी ५ जाने छाईक डाई हुइट । अपने भोगल बिगत सम्झटी “अब्बे छोटकी छाई अनुपा खुलके बटाईबेर लाज लग्ना बिषय काहे पुछल यैसिन टे सक्कु जे भोग परठ कना सामान्य विषय लागे मने रुपान्तरण कक्षाके बारेमे जानकारी पाइलपाछे छाईक लग्गेक संघरीया टे अपनही बटु कना बोध हुइल अब्बे छाईहे पर्ना समस्या महत्वके साथ समाधानके उपाय खोज्न करल बटु ।’
“घर परिवार ओ समाजमे हेरेबेर सामान्य लग्ना वा लउण्डा लउण्डीनहे काहे कहलपाछे पत्ता पैठै ’ कना मान्यताहे वल्र्डभिजन इन्टरनेशनल नेपाल ओ बाल कल्याण संघ टिकापुरके साझेदारीमे सञ्चालित बाल संरक्षण तथा सामुदायिक सहभागिता परियोजना अन्तरगतके रुपान्तरण कक्षासे परिवर्तन करल हो । रूपान्तरण कक्षामे सहभागीहुक्रे अपन अनुभव समस्याके आदानप्रदान करके समस्याके दिर्घकालिन समाधान रोज्न, आत्म जागरणसंगे लैङिकता, घरेलु हिंसा, बालविवाह ओ सामाजिक व्यवहारिक बाट लर्काहुक्रे सिखल बटै ।
रूपान्तरण कक्षामे बाल अधिकार, बाल विवाह, बालश्रम, यौन हिंसा, घरेलु हिंसा, व्यावसायिक तालिम, यौन तथा प्रजनन स्वास्थ्य ओ नागरिक सहभागिता जैसिन व्यवहारिक बाट सिखल ईश्वरी चौधरी बटैठी ।
रुपान्तरण कक्षाके सिकाईसे बालबालिकामे आइल परिवर्तनसे वडा नं. ८ के कार्यालयसे बालबालिका लक्षित दुई ठो छलफल संचालन करल वडा अध्यक्ष तारामल कठरिया जानकारी डेलै । बालक उमेरमे हम्रे हमार रहर पुरा करे नइसेक्ली उ बेला यैसिन परिवर्तनके कल्पनाफे नइरहे अब्बे समयके माग अनुसार सक्षम ओ योग्य नागरिक बनैना बालबालिकाके क्षमता वृद्धि कैना रुपान्तरण कक्षा वरदान सावित हुइना विश्वास लेले बटु ।’ वडा अध्यक्ष कठरिया बटैलै । रुपान्तरण कक्षामे १३ से १८ बर्ष उमेर समुहके २५ जाने बालबालिका सहभागी रहल बटै ।
