मंगरके सुदूरपश्चिम–११ ओ नेपाल पुलिस क्लब प्रतिस्पर्धा
पहुरा समाचारदाता
धनगढी, १३ चैत । मनाङ मस्र्याङ्दी क्लब छैठौं संस्करणके मुख्यमन्त्री सुदूरपश्चिम खप्तड गोल्डकपके सेमिफाइनलमे प्रवेश करले बा ।
धनगढी रंगशालामे सोम्मारके हुइल खेलमे बागमती क्लबहे २–१ गोल अन्तरसे हरैटी मनाङ अन्तिम चारमे स्थान बनाइल हो । मनाङहे जित डेहुइया तिमोथे कोडु ओ साइजमोल एक–एक गोल करल रहिट । यहोर बागमतीके लाग सृजन गौतम एक गोल फर्काइल रहिट ।
खेलके ३७ औं मिनेटमे तिमाथे गोल कैटी मनाङहे सुरुवाती अग्रता डेहुवाइल रहिट । बागमतीसे खेलके ४१ औं मिनेटमे बराबरी गोल फर्काइल रहे । बागमतीके लाग सृजन गौतम बराबरी गोल फर्काइल रहे । पहिल हाफमे १–१ गोलके बराबरी खेलल् मनाङ डुसरा हाफमे थप एक गोल करल रहे । मनाङके लाग खेलके ६६ औं मिनेटमे साइजमोल गोल कैटी टीमहे २–१ गोलके जित डेहुवाइल हुइट ।
जितसँगे मनाङ सेमिफाइनलमे स्थान बनैले बा । आब मनाङ विदेशी टोली एभिनिर फुटबल क्लब क्यामरुनसे सेमिफाइनलमे प्रतिस्पर्धा कैना बा । उक्त खेल चैत १५ गते हुइना बा ।
प्रतियोगिता अन्तरगत मंगरके आयोजक सुदूरपश्चिम–११ ओ विभागीय टोली नेपाल पुलिस क्लब प्रतिस्पर्धा कैना बावै । खेल दिनके ३ः३० बजे सुरु हुइना बा । मोफसलके सर्वाधिक पुरस्कार राशीके प्रतियोगिताके विजेता २१ लाख रुपैयाँ ओ उपविजेता १० लाख रुपैयाँ प्राप्त कैना बाटै ।
सुदूरपश्चिम प्रदेश सरकार मुख्य प्रबद्र्धक रहल प्रतियोगिताहे सुदूरपश्चिम ११ स्पोर्टस क्लब आयोजना करल हो । प्रतियोगितामे आयोजकसहित ‘ए’ डिभिजन ६, विदेशी टोली २ ओ मोफसलके एक सहित १० टोलीके सहभागिता रहल बा । चैत ९ गतेसे सुरु हुइल प्रतियोगिताके फाइनल खेल १८ गते हुइना जनाइल बा ।
