सुदूरपश्चिममे ०.२१ प्रतिशतमे अन्धोपनके समस्या
पहुरा समाचारदाता
धनगढी, १३ चैत । सुदूरपश्चिम प्रदेशमे ०.२१ प्रतिशामे अन्धोपनके समस्या रहल जनागिल बा ।
नेपाल नेत्र ज्योति संघके तथ्याङक अनुसार नेपालमे सन् १९८०÷८१ मे करल पहिल अन्धोपन सर्वेक्षण्मे ०.८४ प्रतिशतमे अन्धोपन डेखलमे सुदूरपश्चिममे १.०२ प्रतिशत व्यक्तिमे उ समस्या डेखल नेपाल नेत्र ज्योति संघके कैलाली शाखा अध्यक्ष दिव्यप्रसाद पन्त बटैलै ।
गैल वर्ष २०२१ ममे करल सर्वेक्षण अनुसार ०.२१ प्रतिशतमे झर्ना सफल हुइल उहाँ बटैलै । १२ वर्ष पहिले सक्कु अन्धोपन मन्से सबसे ढेर मोतिबिन्दुके कारणसे ६२ प्रतिशत दृष्टिविहीन रहलमे हाल ३५ प्रतिशत केल मोतिविन्दुके कारणसे दृष्टि विहिन भेटल उहाँ बटैलै ।
प्रदेश स्तरीय सेवा प्रदान करटी आइल गेटा आँखा अस्पतालसे स्थापनाकालसे यी वर्ष २०७९÷८० पुससम यी अस्पतालमे तथा शिविरमे करके जम्मा ४४ लाख ५२ हजार १२९ जनहनहे आँखी उपचार सेवा प्रदान करलमे ६ लाख ५० हजार ३२ जनहनहे शल्यक्रिया सेवा प्रदान करल उहाँ बटैलै ।
गेटा आँखा अस्पतालमे आँखीक नानीके विशेष उपचार तथा प्रत्यारोपण सेवा, बाल आंखा उपचार सेवा, आँखीक दृष्टि पर्दाके विशेष उपचार सेवा, अकुलोप्लाष्ट सेवा, जलविन्दु उपचार विशेष सेवा, न्यून दृष्टि सेवा कन्ट्याक्ट लेन्स सेवा, ओटिसी सेवा, लेजर सेवा, प्रयोगशाला सेवा ओ अत्याधुनिक स्वचालित मसीनसे चश्माके फिटिङ समेत हुइटी रहल नेपाल नेत्र ज्योति संघके कैलाली शाखा अध्यक्ष पन्त बटैलै ।
आखा उपचार सेवामे पहुंच बढैना आँखा अस्पतालसे यी प्रदेशके ९ जिल्लामे २१ ठो शाखा मार्फत सेवा बिस्तार करले बा । जेम्ने महेन्द्रनगर, टीकापुर ओ डडेल्धुरामे नेत्र विशेषज्ञ सेवा सहित सेकेन्डरी लेवलके अस्पताल, आँखा उपचार केन्द्र धनगढी ओ बेलौरीहे सर्जिकल सेन्टरमे स्तरोन्नती करके धनगढीमे प्रत्येक विफे ओ बेलौरीमे महिनामे एक चो शल्यक्रिया सेवा प्रदान करटी रहल बा ।
गेटा आँखा अस्पतालसे यी वर्ष २ लाख ९५ हजार जनहनहे सेवा प्रदान कैना लक्ष लेहल बा । जौ मन्से २९ हजार ७८४ जनहनहे शल्यक्रिया सेवा प्रदान कैना लक्ष लेके कार्यक्रम संचालनमे रहल बा ।
यी वर्ष प्रदेशके १३५ स्थानमे आँखा शिविर संचालन करके ४२ हजार ५० जनहनहे निःशुल्क सेवा प्रदान कैना जौन मन्से ६ हजार ३२० जनहनहे निःशुल्क शल्यक्रिया कैना लक्ष डेहल बा । ओस्टेक ६७२ विद्यालयके १ लाख १९ हजार ५६६ विद्यार्थीके आँखा परिक्षण करके २ हजार ६०० जनहनहे निशुल्क चश्मा वितरण कैना, १ हजार ७ जाने महिला स्वास्थ्य स्वयं सेविका, ७०० जाने शिक्षक, ४३१ जाने स्वास्थ्यकर्मीहे आँखीक आधारभूत तालिम प्रदान कैना लक्ष लेहल बा ।
नेपालमे आँखी रोगके प्रवर्धनात्मक प्रतिरोधात्मक तथा उपचारात्मक सेवाके माध्यमसे हटाएई सेक्ना अन्धोपनाहे उन्मूलन कैना उद्देश्यसे २०३५ सालमे गैर सरकारी सामाजिक संस्थाके रुपमे नेपाल नेत्र ज्योति संघके स्थापना हुके सेवा प्रदान करटी आइल बा । देशभरमे २७ आँखा अस्पताल १५४ आँखा उपचार केन्द्रसे देशव्यापी रूपमे सर्वसुलभ स्तरीय आखा उपचार सेवा प्रदान करटी आइल बा ।
संसारमे २ अरब २० करोड मनैनके दुरके ओ लग्गेक दृष्टि कमजोर बा जेम्ने मध्ये १ अरब मनैनहे सेवा पुगाई नइसेकल हो । जौन मन्से ३ करोड ६० लाख मनै दृष्टिविहीन बटै । संसारमे ८० प्रतिशतसे ढेर दृष्टि विहीन तथा न्यूनदृष्टि रहुइया अनावस्यक कारणसे अर्थात उपचारसे ठिक हुइ सेक्ना रोगके कारणसे दृष्टि विहीन वा न्यून दृष्टि हुके बाच्न बाध्य बटै । अन्धोपन तथा न्यून दृष्टिसे पीडित ९० प्रतिशत मनै अल्पविकसित ओ विकासोन्मुख देशमे बसोवास करठै ।
