लावा बरसके अवसरमे धनगढीमे हाफ म्याराथन प्रतियोगिता
पहुरा समाचारदाता
धनगढी, १४ चैत । लावा बरस २०८० के अवसरमे इ बरस फेन धनगढीमे हाफ म्याराथन प्रतियोगिता हुइना हुइल बा ।
हरेक बरस प्रतियोगिता कैटी आइल जेसिजसे इ बरस फेन प्रतियोगिता आयोजना कैना हुइल बा ।‘अब धनगढी दौडिन्छ’ काना मूल नाराके साथ धनगढी जेसिजसे नवौँ संस्करणके हाफ म्याराथन प्रतियोगिताके आयोजना करे लागल हो । धनगढी जेसिजसे मंगरके पत्रकार सम्मेलनके आयोजना कैटी प्रतियोगिता बारे जानकारी कराइल हो ।
धनगढी जेसिजके अध्यक्ष मोहन ओझा प्रतियोगिता वैशाख १ गते सकारे ७ बजे धनगढी रङ्गशालासे सुरु हुइना बटैलै । उहाँ म्याराथन प्रतियोगितामे टमान ४ विद्या समावेश करल जानकारी डेलै ।
म्याराथन प्रतियोगितामे खुला (२१.१ किलोमिटर), कर्पोरेट ओ सञ्चार (५ किलोमिटर), ट्राई साइकल रेस (५ किलोमिटर) ओ महिला (५ किलोमिटर) सहित चार विधा आयोजना करे लागल प्रतियोगिताके संयोजक मनिष कुँवर बटैलै ।
म्याराथन प्रतियोगितामे खुला तर्फ प्रथम, द्वितीय ओ तृतीय हुउइयाहे क्रमशः ५५ हजार ५५५, ३३ हजार ३३३ ओ २२ हजार २२२ रुपैयाँ नगद प्रदान कैना बा । ओस्टके कर्पोरेट ओ सञ्चार तर्फ ५ हजार ५५५, ३ हजार ३३३ ओ २ हजार २२२ रुपैयाँ पुरस्कार राखल संयोजक कुँवर जानकारी डेलै ।
ओस्टके, ट्राई साइकल ओर सहभागी सक्कु जनहनहे पुरस्कार डेना बटैटी संयोजक ओझा महिलातर्फ विजयी हुउइयाहे क्रमशः ५ हजार ५५५, ३ हजार ३३३ ओ २ हजार २२२ रुपैयाँ पुरस्कार डेना बटैलै ।
