आगलागी पीडित विपतपुर बस्तीके निर्माणाधिन सुरक्षित आवासके अनुगमन

निर्माण काम समयमे सेक्ना सुझाव

पहुरा समाचारदाता
धनगढी, १४ चैत । कैलाली जिल्ला कैलारी गाउँपालिका–७ स्थित आगलागी पीडित मुक्तकमैया विपतपुर बस्तीमे निर्माणाधिन सुरक्षित आवासके समयमे ओरुवइना आग्रह करल बा ।

मंगरके रोज प्रदेश सरकार, जिल्ला, स्थानीय सरकार, निर्माण करुइया संस्थाके संयूक्त अनुगमनमे परियोजनाके काम समयमे सेक्ना आग्रह करल रहे । गैल बैशाख ११ गतेके भिषण आगलागीसे पूर्णरुपमे क्षति हुइल २७ घरहे सुदूरपश्चिम प्रदेश सरकार भूमि व्यवस्था कृषि तथा सहकारी मन्त्रालय, हयाविटयट फर हुमानिटि नेपालके आयोजनामे ओ राष्ट्रिय दलित नेटवर्कके समन्वय, कैलारी गाउँपालिकाके सहकार्यमे यिहे पुस १० गतेसे निर्माण कार्य सुरु हुइल रहे ।

निर्माणाधिन सुरक्षित आवास कार्यक्रमके सुदूरपश्चिम प्रदेश भुमि व्यवस्था कृषि तथा सहकारी मन्त्रालयके सचिव डा. मदनसिंह धामी, आन्तरिक मामिला तथा कानून मन्त्रालयके सचिव कमलराज ढकाल, प्रमुख जिल्ला अधिकारी यूवराज कट्टेल, भुमि व्यवस्था कृषि तथा सहकारी मन्त्रालयके उपसचिव टिकाराम थापा, आन्तरिक मामिला तथा कानून मन्त्रालयके उपसचिव यूवराज बस्नेत, कैलारी गाउँपालिकाके अध्यक्ष राजसमझ चौधरी, हेविटयाट फर हुमानिटि नेपालके कन्ट्री डाइरेक्टर एलिजा स्थापित, परियोजना प्रबन्धक पुनिता चौधरी, वडा नम्बर ७ के वडा अध्यक्ष दिपेन्द्र बहादुर बम, आरडिएनके महासचिव मोहन वड, केन्दीय सदस्य श्याम सुनार, नित्यानन्द जोशी,हयाविटयट फर हुमानिटि नेपालके इन्जिनियर अनुजराज जोशी, विल्ड अप नेपालके इन्जिनियर गेहेन्द्र कटुवाल, हेविटयाट फर हुमानिटि नेपालके ज्योति भण्डारीलगायतके उपस्थितिमे निर्माणधिन सुरक्षित आवासके अनुगमन कैगिल बा ।

अनुगमनके क्रममे मन्त्रालयके सचिव डा. मदनसिंह धामी, कमलराज ढकाल निर्माणके काम समयमे सेक्लेसे भुक्तानी डेहे सहज हुइना बटैलै । कैलालीके प्रमुख जिल्ला अधिकारी यूवराज कट्टेल आगलागी हुइल ढेर समय हुसेकल ओरसे पीडितहुकनहे राहत महशुस हुइना मेरिक समयमे काम सेक्न आग्रह करले बटै । उहाँ कहलै, अब्बे फेरसे हावाहुरीके समय सुरु हुइना बेला आइटा । ढिला करलेसे बर्षात हाली सुरु हुइलेसे आगलागी पीडितके फेृरसे विचल्ली हुई ।’

कैलारी गाउँपालिकाके अध्यक्ष राजसमझ चौधरी विपतपुरमे आगलागी हुइल दिनसे ओकर पीडितके समस्या बुझटी आइल ओ ओकर निकासके लाग प्रदेश सरकार, संघसे आग्रह करटी आइल बटैलै । उहाँ कहलै, ‘बैशाख ११ खेतुवासे सल्कल आगी बस्तीसम पुगके यी ठाउँके २७ घर जरके खरानी हुइल । बस्तीमे रहल और घरमेफे क्षति हुइल रहे ।’

स्थानीय चुनावपाछे प्रदेश ओ संघके चुनावसे काम आघे बढाई नइसेकल रहे , उहाँ कहलै । निर्माणधिन सुरक्षित आवासके गाउँपालिकासे निशुल्क नक्सा पास कैना व्यवस्था मिलाइल गाउँपालिका अध्यक्ष बटैलै ।

ओस्टेक गाउँपालिका प्रवक्ता तथा वडा–७ के वडा अध्यक्ष दिपेन्द्रबहादुर बम आगलागीसे विपतपुर मुक्तकमैया बस्तीके ७१ घर क्षति पुगलमे २७ घर पूर्ण क्षति हुइल जनैलै । उहाँ कहलै, २७ घर पूर्ण क्षति हुइल बा । यिहीसंगे आंशिक क्षति पुगल मुक्तकमैयाहुकनके लाग प्रदेश सरकारसे सोचे पर्ना जरुरी बा । सुरक्षित आवासके क्रममे बहुट बाधा व्यवधान आइल ओरसे आबसे अइना बाधा व्यवधान प्रदेश सरकार ओ स्थानीय सरकारसे फुकैना आग्रह करलै ।

हयाविटयट फर हुमानिटि नेपालके इन्जिनियर अनुजराज जोशी यी परियोजनाके अवधि २०८० जेठ मसान्तसम रहलेसेफे यिहे बैशाख मसान्तभिटरे काम समापन करके जेठ पहिल साता हस्तान्तरण हुइना मेरिक कामहे तिब्रता डेहल बटैलै ।

हयाविटयट नेपालके कार्यक्रम संयोजक राममनि चौधरी निर्माण हुइटी रहल घरमे दुई कोठा, बरण्डा, ओम्ने जोरल एक ठो भान्सा कोठा ओ चर्पी रहल बटैलै । कोठाके साइज १० वाई १२ रहल ओ घरके वाल पीभिसी व्लक ओ उप्पर टिन रहना जनैलै ।
निर्माणाधिन २७ घरके अनुमान लागत १ करोड बयासी लाख १२ हजार ७७६ रुप्या ९० पैसा रहल बा । ओम्ने भूमि व्यवस्था कृषि तथा सहकारी मन्त्रालय सुदूरपश्चिम प्रदेशसे ९० लाख ओ सुरक्षित आवास परियोजनासे (हयाविटेट फर हुमानिटि नेपाल) ५४ लाख ओ राष्ट्रिय दलित नेटवर्क नेपालसे सामाजिक परिचालन रहल बा । कलेसे लाभग्राही समुदायसे जनश्रमदान ३८ लाख १२ हजार ७७६ रुप्या रहल हयाविटेट फर हुमानिटि नेपालके परियोजना प्रवन्धक पुनिता चौधरी बटैली ।