पटेला सामुदायिक वनके १२औं वार्षिक साधारणसभा निम्जल

पहुरा समाचारदाता
धनगढी, १२ चैत । कैलालीके धनगढी उपमहानगरपालिका–७ पटेलमे रहल पटेला सामुदायिक वन उपभोक्ता समुहके १२औं वार्षिक साधारणसभा सम्पन्न हुइल बा ।

धनगढी उपमहानगरपालिका–७ के वडा अध्यक्ष मोतिराम रानाके वडका पहुनामे हुइल कार्यक्रममे बोल्टी उहाँ पटेला सामुदायिक वनसे सामाजिक सेवा ओ विकासके काममे स्थानीय सरकारहे सहयोग करटी आइल बटैलै ।
धनगढी उपमहानगरपालिका वडा कार्यालयके सिमिति बजेट हुइल ओरसे वडाभिटरके सक्कु समस्या समाधान हुइना करके काम करे नइसेकल हो,’ वडा अध्यक्ष कहलै, पालिकासे कैना कतिपय काम समुदायिक वनसे सहयोग करले बा ।’
सामाजिक विकासके काममे एकजुट हुके लागे पर्ना कहटी पटेला सामुदायिक वनसे शिक्षा, रोजगारी, खेलकुदके साथे सामाजिक क्षेत्रमे लगानी करल बटैलै । उहाँ वडाभिटर स्मार्ट पार्क बनैना कार्य आघे बह्रल कहटी पटेला थारु साँस्कृृतिक संग्राहलयहे सुचारु कैना आम्दानीके स्रोतमे बृद्धि करे सेक्ना बटैलै ।

कार्यक्रममे डिभिजन वन कार्यालयके फरेस्टर रमेश बोगटी, बेली मिलन सामुदायिक वनके अध्यक्ष लालबहादुर खलौला, देवहरिया सामुदायिक वनके सचिव संगिना जागरी, पटेला स्मार्ट यूवा क्लवके अध्यक्ष मुकेश चौधरीलगायतसे मन्तव्य व्यक्त करले रहिट ।

कार्यक्रममे पटेला सामुदायिक वन उपभोक्ता समुहके सचिव चन्द्रा चौधरी सामुदायिक वनके अवस्था ओ आर्थिक वर्ष २०७८÷०७९ के बार्षिक प्रगति विवरण, समुहके कोषाध्यक्ष विके राम खाती आर्थिक बर्ष २०७८÷०७९ सालके लेखा परिक्षण प्रतिवेदन ओ समुहके सल्लाहकार संयोजक अनन्तराम चौधरी आर्थिक बर्ष २०७९÷०८० सालके प्रस्तावित कार्यक्रमबारे जानकारी करैले रहिट ।

पटेला सामुदायिक वन उपभोक्ता समुहके अध्यक्ष अर्जुन चौधरीके अध्यक्षतामे हुइल कार्यक्रममे उपाध्यक्ष धर्मराज चौधरी स्वागत मन्तव्य ओ सचिव चन्द्रा चौधरी कार्यक्रम संचालन करल रहिट ।