योजना उपभोक्ता समितिके पदाधिकारीनहे अभिमुखीकरण

पहुरा समाचारदाता
हसुलिया, १४ चैत । कैलारी गाउँपालिकाके आयोजनामे योजना उपभोक्ता समितिके पदाधिकारीनहे योजना कार्यान्वयन सम्बन्धी एक दिने अभिमुखीकरण तालिम डेहल बा ।

वडा नम्बर ३ संचालन हुइल तालिम उदघाटन कैलारी गाउँपालिका ३ नम्बर ७ के वडा अध्यक्ष सन्तराम चौधरी अध्यक्षतामे हुइल रहे । कार्यक्रममे बोल्टी गुणस्तरीय काम नइकरटसम पालिकासे भुक्तानी हुइना समस्या हुइना बटैलै । प्राविधिकहुक्रे फिटासे नाँपजोख करके काम करठै । जस्टे परिणाम आइल ओस्टे भुक्तानी हुइना उहाँ बटै ।

तालिममे सामाजिक विकास शाखा प्रमुख यगम कलेल, योजना शाखा प्रमुख प्रमुख सन्तोषकुमार चौधरी ओ प्राविधिक हिमाल कुश्मी सहजीकरण करल रहिट ।

कार्यक्रममे उपभोक्ता समितिके काम कर्तव्य अधिकार, आवश्यक कागजात, करकट्टी, सार्वजनिक सुनुवाई, अनुगमन, बजेट विनियोजन प्रक्रिया, संचालनबारे जानकारी डेहल बा । ओस्टेक योजना उपभोक्ता समितिके पदाधिकारीनहे हाल हाली योजनाके काम कैना निर्देशनफे डेहल बा ।

कार्यक्रममे वडा सदस्य किसनलाल चौधरी, शकुन्ताला चौधरी, पार्वती विक, वडा सचिव दयाराम चौधरी, स्वरोजगार सहायक इन्द्रश्याम चौधरी उपभोक्ता समितिके पदाधिकारीहुकनके उपस्थिति रहल रहे ।