संस्कृति बँच्लेसे केल पहिचान जोगिः गाउँपालिका अध्यक्ष

पहुरा समाचारदाता
हसुलिया, १६ चैत । कैलारी गाउँपालिकाके अध्यक्ष राजसमझ चौधरी संस्कृति बँच्लेसे केल पहिचान जोग्ना बटैले बटै ।

हमार संस्कृति हमार पहिचान कना मुल नाराके साथ विफेक रोज वडा नम्बर ८ के कार्यालयसे आयोजना कैगिल वडा स्तरीय सांस्कृतिक कार्यक्रम २०७९ के वडका पहुना रहल उहाँ उ बाट बत्वाइल रहिट । उहाँ कहलै, ‘कौनोफे समुदायके पहिचान ओइनके भाषा, संस्कृति, कला, परम्परा, भेषभुसा, पहिरन, गरगहना, खानापानसे रितिरिवाजसे चिन्हाइठ । थारु समुदाय कला संस्कृतिके धनी समुदाय हुइट । पहिरन ओ बोलीसे ओइनके पहिचान खुलठ ।’

आधुनिकताहे अपनैना क्रममे अपन संंस्कृति विस्राई नइहुइना गाउँपालिका अध्यक्ष बटैलै । कैलारी गाउँपालिकामे थारु समुदायके बसोबास ढेर बा, और समुदायके बसोबासफे रहल ओरसे सक्कुहुनके कला, संस्कृति जोगैना स्थानीय सरकारके कर्तव्य रहल उहाँ बटैलै ।

कार्यक्रमके विशिष्ट पहुना नेपाली काँग्रेस कैलालीके उपसभापति खेमराज डगौराथारु संस्कृति संरक्षणके लाग पुर्खनके सिखाइल संस्कृति यूवा पुस्तामे हस्तान्तरण आवश्यक रहल बटैलै ।

ओस्टेक करके विशिष्ट पहुना नेपाली काँग्रेस कैलारी गाउँपालिका सभापति कृष्णप्रसाद चौधरी संस्कृति संरक्षणके लाग सांस्कृति कार्यक्रमहे निरन्तरता डेहे पर्ना बटैलै ।

ओस्टेक करके दक्षिण टेढीके भल्मन्सा बाँधुराम चौधरी संस्कृति संरक्षणमे बडघर भल्मन्साहुकने भारी योगदान रहल बटैलै । थारु समुदायके बडघर÷भल्मन्सा प्रथा ओझेलमे परटी गैल ओरसे ऐन पारित संग्गे कार्यान्वयनमे नन्नामे जोर डेहल रहित ।

वडा नम्बर ८ के वडा अध्यक्ष तारामल कठरियाके घरगोस्यामे हुइल कार्यक्रममे स्वागत मन्तव्य वडा सदस्य लक्ष्मी चौधरी ओ संचालन वडाके कृषि प्राविधिक हेमराज ढुङ्गाना करले रहिट ।

वडा स्तरीय सांस्कृतिक कार्यक्रम २०७९ मे वडा नम्बर ८ के सक्कु टोलके सांस्कृति प्रस्तुती हुइल रहे । जेम्ने होरी, देउडा, सखिया, झुम्रालगायत महालोक गायक मनिराम चौधरी ओ हस्या कलाकार सुरविन चौधरीके प्रस्तुती हुइल रहे । ओस्टेक करके द्वन्दपीडित, प्रत्येक टोलके एक÷एक जाने जेष्ठ नागरिकहुकनके सम्मान कार्यक्रम कैगिल रहे । कार्यक्रममे स्थानीय, बुद्धिजिवी, टमान राजनितिक दलके प्रतिनिधिहुकनके सहभागी रहल रहे ।