खप्तड गोल्ड कपके उपाधि थ्रीस्टारहे
पहुरा समाचारदाता
धनगढी, चैत १८ । धनगढीमे जारी छैटौं संस्करणके मुख्यमन्त्री सुदूरपश्चिम खप्तड गोल्डकप अन्तर्राष्ट्रिय फुटबल प्रतियोगिताके उपाधि थ्रीस्टार क्लब जिट्ले बा ।
धनगढी रंगशालामा शनिच्चरके रोज हुइल फाइनलमे खेलमे ए डिभिजन प्रतिद्वन्द्वी मनाङ मस्र्याङ्दी क्लबहे २–० गोल अन्तरसे हरैटि थ्रीस्टार प्रतियोगिताके उपाधि जिटल हो ।
थ्री स्टारके जितमे अनिल महर्जन ओ कप्तान बिक्रम लामा एक÷एक गोल करलैं । अनिल खेलके ७३ औं मिनेटमे फ्रिकिक मार्फत गोल करटि टोलीहे सुरुवाती अग्रता दिलैले रहैं । खेलके इन्जुरी समयके चौंथो मिनेटमे कप्तान बिक्रम लामा गोल करटि थ्रीस्टारहे २–० के जित दिलैलैं ।
उपाधि जिटसँगे थ्रीस्टार २१ लाख रुपैयाँ प्राप्त करले बा कलेसे उपविजेता बनल मनाङ १० लाख रुपैयाँ पुरस्कार पैले बा । थ्रीस्टार क्लब पहिलचो सुदूरपश्चिम खप्तड गोल्डकप अन्तर्राष्ट्रिय फुटबल प्रतियोगिताके च्याम्पियन बनल हो । मनाङ भर तेसरचो खप्तड गोल्डकपके उपाधि जिटसे बन्चित हुइल बा । प्रतियोगिताके सर्वोकृष्ट खेलाडी थ्रीस्टार क्लबके कप्तान विक्रम लामा हुइट । उहाँ नगद एक लाख प्राप्त करलैं ।
प्रतियोगिताके उत्कृष्ट गोलरक्षक थ्रीस्टारके मोहमद ताहा, उत्कृष्ट रक्षक थ्रीस्टारके पिटर सेगनु, उत्कृष्ट मिडफिल्डर मनाङके विसोन गुरुङ, सर्वाधिक गोलकर्ता मनाङके सायीजमल, उत्कृष्ट प्रशिक्षक थ्रीस्टारके मेघराज केसी ओ उदयमान खेलाडी सुदूरपश्चिम ११ के दीपेन्द्र मलासी हुइलैं । उहाँहुक्रे जनही नगद १५ हजार रुपैयाँ प्राप्त करलैं ।
सुदूरपश्चिम ११ स्पोर्ट्स क्लबके आयोजनामे हुइल प्रतियोगितामे ‘ए’ डिभिजनके ६ टिम, दुई विदेशी टिम, मोससलके बागमती युथ क्लब ओ आयोजक क्लब कैके १० टिमके सहभागिता रहल रहे ।
सुदूरपश्चिम प्रदेश सरकार मुख्य प्रवद्र्धक रहल प्रतियोगिताके विजेताहे प्रदेश सरकारके भौतिक पूर्वाधार मन्त्री प्रकाश देउवा लगायत पुरस्कृत करले रहैं ।
