नमस्ते सहकारीसे तीन पालिकामे कार्यक्षेत्र विस्तार

पहुरा समाचारदाता
धनगढी, १९ चैत । थारु समुदायके आर्थिक शसक्तीकरणमे टेवा पुगाइक लाग कैलाली जिल्लाके धनगढी उपमहानगरपालिका–८ मे १४ बरस पहिले स्थापना हुइल नमस्ते बचत तथा ऋण सहकारी संस्था लिमिटेड ठप तीन पालिकामे कार्य क्षेत्र विस्तार कैले बा ।

धनगढी उपमहानरपालिकाके १९ वडासे सेवा डेटी रहल सहकारी कैलालीके कैलारी गाउँपालिका, गौरीगंगा नगरपालिका ओ गोदावरी नगरपालिकामे कार्यक्षेत्र विस्तार करल सहकारीके अध्यक्ष जगतराम चौधरी बटैलै । उहाँ कहलै, ‘थारु समुदायमे पहिले महजानी प्रथा रहे, काम लागल ब्याला पैसा महजनसे लेहे परे, सरकारी बैंकसे लोन निकरेबेर हमार पहुँच नइपुगे, जेकर कारण समुदाय कुछ भारी व्यवसाय करे नइपाइट ।’ महजानी प्रथाके अन्त्य कैटी थारु समुदायमे आर्थिक क्रान्ति नानेक लाग थारु समुदायके लगानीमे सहकारी स्थापना करल अध्यक्ष चौधरी बटैलै । सहकारी प्रगतिके डगरमे लम्कटी अब्बे तीन पालिकामे कार्यक्षेत्र विस्तार कैना सफल हुइल उहाँ बटैलै ।

२०६५ सालमे ढेड लाख शेयर पुँजी ओ २५ जाने शेयर सदस्यसे सुरुवाट करल यीे सहकारीके २०७८/७९ के वासलतमे हेरेबेर पुससम कुल सम्पति अब्बे ४३ करोड ९० लाख २६ हजार २९८ रुप्या पुगल संस्थाक प्रवन्धक विजय चौधरी बटैलै ।

यी संस्थाके शेयर सदस्य संख्या भर अब्बसम ६ हजार २८४ जाने पुगल बटै । यी सहकारीमे जम्मा संचालक समिति ओ शेयर सदस्य सक्कु थारु समुदायक केल रहल बटै । सहकारीके स्थिर सम्पत्तिमे जग्गा घर, भवन, कार्यालय, फर्निचर, साधान परिवाहनमे ३ करोड ५० लाख ९८ हजार ८०१ रुप्या बराबर रहल उहाँ बटैलै ।