६६ औं राष्ट्रिय सहकारी दिवस मनागिल
पहुरा समाचारदाता
धनगढी, २० चैत । ६६ औँ राष्ट्रिय सहकारी दिवस टमान कार्यक्रम कैके मनागिल बा । धनगढीमे सहकारी दिवसके अवसरमे प्रभात फेरी र्यालीके आयोजना कैगिल बा ।
भूमि व्यवस्था, कृषि तथा सहकारी मन्त्रालयके अङगनासे निकरल प्रभात फेरी र्याली धनगढी बजार हुइटी जिल्ला सहकारी संघ लिमिटेड कैलालीके अङगनामे पुगके सभामे परिणत हुइल रहे । सुदूरपश्चिम प्रदेश सरकारके मुख्यमन्त्री कमलबहादुर शाहके वडका पहुनामे हुइल र्यालीके उदघाटन कार्यक्रममे बोल्टी उहाँ अर्थतन्त्रमे सहकारीके महत्वपूर्ण भूमिका खेलल बटैलै ।
सहकारीसे कृषि, पशुपन्छी तथा मलखादमेफे किसानहे ओटरे टेवा पुगाइल बटैटी उहाँ कहलै, ‘सहरकारीसे कृषि क्षेत्रहेफे उकस्ले बा । कृषिके हरेक क्षेत्रमे सहकारीसे खेलल भूमिका महत्वपूर्ण बा ।’ सहकारी दिवस मनैना क्रममे धनगढीमे उत्साहजनक सहभागिता रहल बटैटी सहरकारीप्रति गाउँ टोलमे विश्वास ओ भरोसा बह्रल बटैलै ।
कार्यक्रममे गौरीगंगा नगरपालिकाके उपप्रमुख तथा सहकारी अभियन्ता भोजबहादुर बम सहकारी क्षेत्र बहुआयामिक रहल बटैलै । उहाँ राष्ट्रके समृद्धिके लाग सहकारी क्षेत्रसे खेलल भूमिका महत्वपूर्ण रहल बटैलै । सहकारीसे करल सहयोगसे गाउँबस्तीके किसानहे अर्थउपार्जनमे टेवा पुगल उहाँ बटैलै ।
उहाँ कहलै, छिकल पुँजीहे सहरकारीसे एकीकृत करके उहे समुदायमे लगानी करले बा । जिहीसे सहुलियतमे विना धितो गरिब किसानसे ऋण लेके आयआर्जनके क्रियाकलापमे लगानी करल प्रसस्त उदाहरण बटै ।’
भूमि व्यवस्था, कृषि तथा सहकारी मन्त्रालयके सचिव डा. मदनसिंह धामी सहकारीके माध्यमसे कृषि क्षेत्रमे पुगल टेवाके चर्चा करलै । प्रभात फेरीपाछे समापन समारोहके सभापति तथा जिल्ला सहकारी संघ लिमिटेड कैलालीके अध्यक्ष फणिराज सापकोटा पछिल्का समयमे एक/दुई सहकारीसे करल गलत क्रियाकलापसे समग्र सहकारीके कुप्रचार करे नइहुइना बटैलै ।
उहाँ कहलै, ‘कुछ सहकारीसे करल गलत कामसे समग्र सहकारीहे मोछे नइपरल । सहकारीसे करल मजा कामके कबु प्रचार नइहुइल । टबमारे हम्रे करल मजा कामफे समाजमे बटै कना बाट सक्कुहुनहे सुनैना जरुरी रहल बा ।’
ओस्टेक करके भीमदत्त नगर सहकारी संघके आयोजनामे कञ्चनपुरमेफे प्रभातफेरी कार्यक्रम करके ६६ औं राष्ट्रिय सहकारी दिवस मनाइल बा । सहकारीके दिगोपना, स्वनियम ओ सुशासन कना नाराके साथ ६६औं राष्ट्रिय सहकारी दिवस मनाइल हो ।
प्रभातफेरीपाछे भानु पार्टी प्यालेसमे औपचारिक कार्यक्रम करल बा । भीमदत्त नगरपालिका कार्यालयसे प्रभातफेरी सुरु हुके मदनचोक हुइटी औपचारिक कार्यक्रममे परिणत हुइल रहे ।
भीमदत्त नगरपालिकाके मेयर पदम बोगटीके वडका पहुनामे हुइल कार्यक्रममे उहाँ सहकारी सञ्चालनहे सहज बनैना नगरपालिका आवश्यक सहयोग कैना संघ तत्पर रहल बटैलै । सहकारीहे व्यवस्थित कैना ऐन कानून संशोधन, जनशक्ति व्यवस्थापन, उत्पादन बिक्रीके लाग बजार व्यवस्थापन लगायतके कार्यमे सहयोग कैना उहाँक कहाइ रहे । कार्यक्रममे राष्ट्रिय सहकारी बोर्डके सदस्य दशरथ भण्डारी नगरपालिकाके सहकारी शाखाहे व्यवस्थित कैना मेयर बोगटीहे आग्रह करले बटै ।
उदयदेब बहुद्देश्यीय सहकारी संस्थाके प्रबन्धक गणेशबहादुर चन्द, जिल्ला बचत तथा ऋण सहकारी संघके अध्यक्ष प्रेमसिह भाट लगायतसे शुभ कामना मन्तव्य राखल रहिट ।
नगर सहकारी संघके अध्यक्ष खरेलसे गलत नियतले सहकारी सञ्चालन कैना परिपार्टी बैठटी गैल ओरसे नगरपालिकासे समयमे नियन्त्रण करे पर्ना जोड डेलै । कार्यक्रममे भीमदत्तके उपमेयर निलम लेखक जोशी, भीमदत्तके प्रमुख प्रशासकीय अधिकृत याम नारायण गौली लगायतके सहभागी रहल रहे ।
कार्यक्रममे सहकारी क्षेत्रके विकासमे योगदान पुगैना टमान क्षेत्रके व्यक्तिहे सम्मान समेत करल बा । ओइनमे प्रताप साउँद, विमला भट्ट, भवानी भन्द, रघुवर भट्ट, प्रकाश थपलिया, विमला भाट लगायतके बटै । ओइने सक्कुहुनहे खादा ओढाके सम्मानपत्र प्रदान करल बा ।
कार्यक्रममे नगर सहकारी संघके उपाध्यक्ष उत्तम बोहरासे स्वागत मन्तव्य राखल कार्यक्रमके सञ्चालन सचिव मोहन बहादुर चन्द करले रहिट ।
