आयोजक क्वाटर फाइनलमे
पहुरा समाचारदाता
धनगढी, २१ चैत । कैलालीके गौरीगङ्गा नगरपालिकामे मंगरसे जगशक्ति गोल्ड टिएमटी तेस्रो सुदूरपश्चिम गौरीगङ्गा गोल्ड कप २०७९ सुरु हुइल बा । मंगरके हुइल उद्घाटन खेलमे डोटीहे ३–१ से पराजित कैटी आयोजक गौरीगङ्गा–११ स्पोर्ट्स क्लब क्वाटर फाइनलमे प्रवेश करले बा ।
उद्घाटन खेलमे पुनरागमन जित निकरटीआयोजक क्वाटर फाइनलमे पुग्ना सफल हुइल हो । खेलके ११ औँ मिनेटमे डोटीके १२ नम्बर जर्सीके खेलाडी हेरी सिंह गोल कैटी अग्रता बनाइल रहिट । ४० औँ मिनेटमे आयोजकके ओरसे जर्सी नम्बर १४ के गणेश लुहार गोल करेबर पहिल हाफके खेल बराबरीमे ओराइल रहे । डुसरा हाफके ७६ औँ मिनेटमे डी बक्स भिट्टर गौरीगङ्गाके खेलाडी फल हुइलपाछे पेनाल्टी पके दिनेश थापा पेनाल्टी गोल मार्फत खेलहे खेल २–१ को अवस्थामे पुगाइल रहिट । खेलके ८१ औँ मिनेटमे आयोजकके जनक साउद गोल कैटी टीमहे सहज जित डेहुवाइल रहिट । खेलके प्लेयर अफ दी म्याच फेन उहाँ हुइल रहिट ।
‘खेलौँ फुटबल रमेर, खेलकुदको सन्देश, शान्ति स्थायित्व र एकताबद्ध देश’ कना नाराके साथ गौरीगङ्गा–११ स्पोर्टस क्लबके आयोजनामे सुरु हुइल प्रतियोगिताके सुदूरपश्चिमके प्रदेश प्रमुख देवराज जोशी उदघाटन करल रहिट ।
प्रदेश प्रमुख जोशी खेलकुद क्षेत्र व्यावसायिक बने नैसेकल बटाइल रहिट । उहाँ कहलै –‘खेलकुदप्रति युवाहुक्रनके आकर्षण बह्रटी गैल बा । मने, व्यावसायिक नैबनके खेलाडीहे जीविकोपार्जन कैना समस्या हुइल बा ।’ उहाँ राज्यसे नै खेलकुदहे अतिरिक्त क्रियाकलापके रूपमे लेहल बटैलै । उहाँ खेलकुदके विकासके लाग हरेक बरस टमान प्रतियोगिता हुइना आवश्यक रहल बटैलै । उहाँ कहलै–‘प्रतियोगितासे खेलाडीके विकास कैनाके साथे खेलसे शारीरिक तन्दुरुस्ती, अनुशासित बनैना मद्दत करठ् ।’
सुदूरपश्चिम प्रदेश सभा सदस्य प्रकाश बम खेलाडी लगनशील, अनुशासित नैहुइटसम खेलकुदके विकास सम्भव नैरहल बटैलै । उहाँ खेलकुद कहलक पहिचान रहल बटैलै । उहाँ कहलै–‘खेलकुदसे कौनो क्षेत्र, स्थान तथा राष्ट्रके पहिचान डेहठ् । इ पहिचानके कडी हो ।’
प्रदेश सभा सदस्य जानकी कुँवर खेलमैदानके स्तरोन्नतिसँगे इ निर्वाचन क्षेत्रके आवश्यकता का हो स्थानीयके मागके आधारमे विकासके लाग पहल कैना बटैली ।
। प्रतियोगिता चैत ३० गतेसम आयोजना हुइना बा । प्रतियोगितामे १० टीमके सहभागिता रहल बा । आयोजक गौरीगंगा–११ सँगे कैलाली, कञ्चनपुर, डोटी, बाजुरा, बांके, बर्दिया, नवलपरासी जिल्लाका टीमके साथे नेपाल पुलिस ओ शसस्त्र प्रहरी बलके टीमके सहभागीता रहल बा ।
प्रतियोगिताके विजेताहे ट्रफी सहित नगद ४ लाख ओ उपविजेताहे ट्रफी सहित नगद २ लाख पुरस्कार प्रदान करजैना बा कलेसे सर्वोत्कृष्ट खेलाडीहे नगद ५० हजार प्रदान करजैना आयोजक जनैले बा । साथे सर्वाधिक गोलकर्ता, उत्कृष्ट गोलरक्षक लगायत टमान विद्याके उत्कृष्ट खेलाडीहे विधागत रुपमे ट्रफी सहित नगद १० हजार पुरस्कार डेजैना बा । प्रतियोगिताके ‘म्यान अफ द म्याच’ हे ट्रफी सहित नगद ५ हजार प्रदान करजैना आयोजक जनैले बा ।
सुदूरपश्चिम प्रदेशके पर्यटन प्रबद्र्धधन कैना, नगर क्षेत्रमे खेलकूदके चहलपहल बह्रैना, व्यवसायीक खेलाडी उत्पादन तथा युवाहे खेलकूदमे लग्ना अभिप्रेरित करक लाग प्रतियोगिता करटी रहल क्लबके अध्यक्ष दिनेश कलेल जानकारी डेलै ।
