२२ लाख जनहनहे कोरोनाविरुद्धके खोप

पहुरा समाचारदाता
धनगढी, २२ चैत । सुदूरपश्चिम प्रदेशमे हालसम २२ लाख ढेर कोरोना भाइरसविरुद्धके पूर्ण खोप लगैले बाटै । प्रदेशके नौ जिल्लामे हालसम पूर्ण मात्रा लगुइयाके संख्या कूल २२ लाख ३३ हजार आठ सय ३१ रहल सुदूरपश्चिम प्रदेश स्वास्थ्य निर्देशनालय जनैले बा । पूर्ण मात्रा लगुइया सबसे ढेर कैलालीके सात लाख ३२ हजार सात सय ८९ जाने रहल बाटै ।

सबसे कम दार्चुलामे एक लाख १४ हजार ६ सय २८ कोरोनाविरुद्धके पूर्ण खोप लगाइल सुदूरपश्चिम प्रदेश स्वास्थ्य निर्देशनालयके कोभिड–१९ सम्पर्क व्यक्ति हेमराज जोशी जानकारी डेलै । ओस्टके कञ्चनपुरमे चार लाख ३९ हजार एक सय ६८, बैतडीमे दुई लाख ११ हजार छ सय ५२, अछाममे एक लाख ८३ हजार छ सय दुई, डोटीमे एक लाख ६१ हजार एक सय ३८, बझाङमे एक लाख ३७ हजार छ सय ११, डडेल्धुरामे एक लाख २७ हजार सात सय २५ ओ बाजुरामे एक लाख २५ हजार चार सय ६८ जाने कोरोनाविरुद्धके पूर्ण खोप लगैले बाटै ।

प्रदेशमे हालसम कोरोना भाइरसविरुद्धके तेस्रो तथा बुस्टर डोजके पहिल मात्रा लगुइयाके संख्या भर दश लाख १५ हजार ३७ रहल बा । प्रदेशमे कोरोना भाइरसविरुद्धके चौथो तथा बुस्टर डोजके दोस्रो मात्रा लगुइयाके संख्या भर २९ हजार आठ सय ५६ रहल निर्देशनालय जनैले बा । बैतडीमे भर एकजाने फेन कोरोना भाइरसविरुद्धके चौथो तथा बुस्टर डोजके दोस्रो मात्रा नैलगाइल स्वास्थ्य कार्यालयके सूचना अधिकारी विपिन लेखक जानकारी डेलै । जिल्लामे कुछ दिनमे चौथो मात्रा डेना अभियान सञ्चालन कैना लेखकके कहाइ रहल बा ।

सुदूरपश्चिममे कोभिसिल्ड, अस्ट्राजेनेका, भेरोसेल, जोन्सन एन्ड जोन्सन, फाइजर, मोडर्ना खोप लगाइल हो । प्रदेशमे हाल फेन कोरोनाविरुद्धके खोप लगैना अभियन जारी रहल ओरसे खोप लगैना बाँकी सक्कु जनहनहे खोप लगैना आग्रह करल बा । सुदूरपश्चिममे विसं २०७७ माघ १४ गतेसे कोरोना भाइरसविरुद्धके अभियान सुरु करल रहे । प्रदेशसमे हालसम ६ लाख ४६ हजार सात सय तीनजनहनके कोरोना परीक्षण करल बा कलेसे जौनमध्ये ६१ हजार नौ सय ५५ जहनमे सङ्क्रमण होसेकल बा । सङ्क्रमणके कारण इ प्रदेशमे छ सय ३५ जाने ज्यान गुमैले बाटै ।

भारतसँग सीमा जोरल इ प्रदेशमे दैनिक कोरोना सङ्क्रमण बह्रटी रहल बा । संक्रमण डेखजैना अधिकांश भारतसे अइना हुइल ओरसे यहाँ जोखिम बह्रटी गैल बा । प्रदेशके सक्कु सीमानाकामे हेल्थ डेस्क स्थापना करल ओ अनिवार्य कोरोना परीक्षण कराके किल आइ डेहल बा । सङ्क्रमणके जोखिम बह्रटी गैल जनस्वास्थ्यके मापदण्ड अनिवार्य रुपमे पालना कैना निर्देशनालयसे आग्रह करले बा ।

कोभिडके बुस्टर डोज लगुइयाके संख्या न्यून

कञ्चनपुरमे कोभिडविरुद्धके बुस्टर डोज खोप लगुइयाके संख्या न्यून रहल बा । जिल्ला स्वास्थ्य कार्यालय कञ्चनपुरसे बिफेसे ‘बुस्टर डोज’ खोप अभियान सुरुआत करल रहे । खोप लगुइयाके संख्या न्यून रहल जिल्ला स्वास्थ्य कार्यालय कञ्चनपुरके कोल्ड चेन अधिकृत जनक कुँवर जानकारी डेलै ।

भारतसे नेपाल अउइयामे कोरोना संक्रमण डेख परे लागलपाछे कोभिडविरुद्धके तेस्रो मात्रा ओ चौथो मात्राके खोप अभियान सुरु हुइल रहे मने खोप अभियानके सहभागिके संख्या न्यून रहल उहाँ बटैलै । “खोप लगुइयाके संख्या कम रहल बा । पहिल डोज पाछे ढेर मनै खोप लगाइ नैअइला,” उहाँ कहलै, “अब्बे खोप अभियानमे फेन खोप लगाइ अउइयाके कम रहल बाटै । खोप लगाइक लाग सक्कु जनहनहे आग्रह करटी ।”

अब्बे ५५ बरस उप्परके ज्येष्ठ नागरिक, स्वास्थ्यकर्मी, गर्भवती ओ रोग प्रतिरोधात्मक क्षमता कम रहलहे बुस्टर डोजके रूपमे खोप डेहे लागल बा । कञ्चनपुरके बेदकोट नगरपालिकाके स्वास्थ्य शाखा प्रमुख हरिशा पाल बुस्टरडोज लगाइ अउइयाके संख्या न्यून रहल बटैलै । “हमार नगरपालिकामे पाँच हजार ४०० डोज खोप आइल बा,” उहाँ कहलै, “शनिच्चरसम करिब एक हजार ५०० जाने किल खोप लगैले बाटै, इ न्यून हो ।”

“हम्रे गाउँगाउँमे माइकिङसमेत करल रही,” उहाँ कहलै, “इ बेर बुस्टर डोज लगाइ न्यून मनै अइला ।”भीमदत्त नगरपािलकाके स्वास्थ्य शाखा प्रमुख नरेन्द्रराज जोशी फेन पालिकामे १० हजार डोज खोप अइलेसे फेन खोप लगुइया मनैनके संख्या कम रहल बटैलै । “पहिलचो खोप लगाइबर अक्को फुर्सट नैरहे, अब्बे आइल खोप समेत फिर्ता करे पर्र्ना अवस्था आइल बा,” उहाँ कहलै, “सक्कु वडाके स्वास्थ्य संस्थामे खोप उपलब्ध बा लगाइ अउइयाके संख्या न्यून रहल बा ।”

कार्यालयके अनुसार कञ्चनपुरमे बुस्टर डोजके लाग ५० हजार डोज खोप आइल बा । कार्यालयके तथ्यांकअनुसार हालसम कञ्चनपुरमे ४८ दशमलव ३० प्रतिशत किल कोभिडविरुद्धके खोप लगैले बाटै । जिल्लामे चार लाख चार हजार ५४५ जाने कोरोनाविरुद्धके खोपके पहिल मात्रा लगैले बाटै । ओस्टके तीन लाख ६४ हजार ७८५ जाने दोस्रो मात्रा लगैले बाटै कलेसे दुई लाख १६ हजार ६६७ जाने खोपके तेस्रो मात्रा लगैले बाटै । पहिल मात्रापाछे खोप लगुइयाके संख्या घट्टी गैल स्वास्थ्य कार्यालय जनैले बा ।