प्रादेशिक आयुर्वेद चिकित्सालयके उद्घाटन

पहुरा समाचारदाता
धनगढी, २२ चैत । धनगढी उप महानगरपालिका वडा नम्बर १३ मे सुदूरपश्चिम प्रादेशिक आयुर्वेद चिकित्सालय सञ्चालनमे आइल बा । आयुर्वेदिक पद्धतीसे सरल उपचार सेवा डेना उद्देश्यसे कुछ महिनाआघेसे सेवा शुरु करल चिकित्सालयके बुधके सुदूरपश्चिम प्रदेशके मुख्यमन्त्री कमल बहादुर शाह एककार्यक्रमके बिच उद्घाटन करल हुइट ।

आयुर्वेदिक बिधिके उपचार सेवाहे बिस्तार कैना योजनाके साथ सातु प्रदेशमे आयुर्वेद चिकित्सालय सञ्चालनके लाग संघ सरकारसे बजेट बिनियोजन करल रहे । प्रादेशिक आयुर्वेद अस्पताल प्रदेश सरकार माथहत राखल बा । चिकित्सालयके उद्घाटन कैटी मुख्यमन्त्री शाह प्रदेश सरकारके बरवार सम्पत्तिके रुपमे रहल आयुर्वेद चिकित्सालयहे प्रवद्र्धन कैना दायित्व प्रदेश सरकारके रहना बटाइल रहिट । यकर संरक्षण संगे थप सेवाके लाग प्रदेश सरकार आवश्यक पहल कैना मुख्यमन्त्री शाहके कहाइ रहे ।

चिकित्सालयमे बिरामीहे निःशुल्क उपचार ओ औषधि वितरण कैना करल बा । प्रदेश सरकारसे ५० शैयाके स्वूकृति पाइल प्रादेशिक आयुर्वेदिक चिकित्सालयमे लावा बरससे अन्तरङ्ग सेवा सुरु कैना योजना रहल बा । चिकित्सालय व्यवस्थापन समितिके अध्यक्ष नरेश बिष्टके अनुसार अब्बे बहिरङ्ग, प्रयोगशाला ओ पञ्चकर्म–पूर्वकर्म, होमियोपेथी उपचार सेवा डेटी रहल बा । प्रादेशिक आयुर्वेद चिकित्सालयसे बाथ रोग, नसा च्यापल, हड्डी खियाइल, पक्षघात ओ छाला सम्बन्धि समस्या रहल बिरामीके उपचार हुइना करल उहाँ बटैलै । निकट भविष्यमे फिजियोथेरापी, अकुपञ्चर ओ योग सेवा सञ्चालन हुइना बटाइल बा ।

चिकित्सालयसे स्वास्थ्य शिविर सञ्चालन करलसंगे बिरामी अइना क्रम फेन बह्रल जनाइल बा । दैनिक १५० से ढेर बिरामी चिकित्सालयसे सेवा लेहल जनाइल बा । आयुर्वेदिक चिकित्सालय सञ्चालन हुइल सँगे सहज मेरके उपचार सेवा पैना स्थानियके अपेक्षा रहल बा । पञ्चकर्म–पूर्वकर्म बिधिसे समेत उपचार शुरु हुइलपाछे बिरामीके रोजाइमे आयुर्वेद पद्धती पर्ना विश्वास लेहल बा । आब इ क्षेत्रमे आयुर्वेद प्रसोधन केन्द्रके समेत स्थापना कैके स्वास्थ्य संगे आर्थिक विकासमे फेन लागे पर्ना आम नागरिकके माग रहल बा ।

धनगढी उपमहानगरपालिका वडा नम्बर १३ राजपुरमे रहल आयुर्वेद चिकित्सालयसे कुँवार ११ गते लावा भवनसे सेवा सुरू करल रहे । गैल कात्तिक २६ गतेसे पहिलचो पञ्चकर्म–पूर्वकर्म विधिसे उपचार सेवा सुरु करल चिकित्सालयमे हाल दैनिक १८० ढेर बिरामी अइना करल बाटै । चिकित्सालयसे ढिरेसे सेवा थप्ना ओ आम नागरिकहे आयुर्वेदिक उपचार ओर आकर्षण बह्रैना जनाइल बा ।