कोहलपुर रेसिङ सहारा क्लब सेमिफाइनलमे
पहुरा समाचारदाता
धनगढी, २२ चैत । कैलालीके गौरीगंगामे जारी जगशक्ति गोल्ड टिएमटी तेसर सुदूरपश्चिम गौरीगंगा गोल्ड कपमे बाँकेके कोहलपुर रेसिङ सहारा क्लब सेमिफाइनलमे प्रवेश करले बा । बुधके रोज एपिएफके टोलीहे ३–१ गोल अन्तरसे पराजित करटि कोहलपुर रेसिङ सहारा क्लब अन्तिम चारमे पुग्ना सफल हुइल हो ।
खेलके १५ औँ मिनेटमे पेनाल्टी पाके अग्रता बनैना सफल हुइल एपिएफउप्पर रेसिङ सहारा क्लब पुनरागमन जित निकरना सफल हुइल । डी बक्सभित्तर रेसिङके खेलाडीके हातमे बल लागके फल हुइलपाछे पाइल पेनाल्टीमे एपिएफके आस तामाङ उ पेनाल्टीहे गोलमे परिणत करले । ओकरपाछे निरन्तर दबाबमे ढरल रेसिङके अविनाश थापा खेलके २८ औँ ओ ८७ औँ मिनेटमे दुई गोल करलैं । अस्टेक कृष्ण क्षेत्री पहिल हाफके ४२ औँ मिनेटमे १ गोल करलैं । खेलके प्लेयर अफ दी म्याच अविनाश बन्लैं ।
प्रतियोगिता अन्तर्गत बिफेक रोज बाजुराके रानीवन क्लब ओ नेपाल पुलिसके टिम प्रतिस्पर्धा करि ।
‘खेलौँ फुटबल रमेर, खेलकुदके सन्देश, शान्ति स्थायित्व ओ एकताबद्ध देश’ कना नाराके साथ गौरीगंगा–११ स्पोर्टस् क्लबसे आयोजना करल प्रतियोगिता चैत ३० गतेसम सञ्चालन हुइना बा । आयोजक गौरीगंगा–११ सँगे कैलाली, कञ्चनपुर, डोटी, बाजुरा, बाँके, बर्दिया, नवलपरासी जिल्लाके टिमके साथे नेपाल पुलिस ओ सशस्त्र प्रहरी बलके टिमके कैके १० टिमके सहभागिता रहल बा ।
प्रतियोगिताके विजेताहे ट्रफीसहित नगद ४ लाख ओ उपविजेता ट्रफीसहित नगद २ लाख पुरस्कार प्रदान करजाइ कलेसे सर्वोत्कृष्ट खेलाडीहे नगद ५० हजार प्रदान करना आयोजक जानकारी डेले बा । साथे सर्वाधिक गोलकर्ता, उत्कृष्ट गोलरक्षक लगायत टमान विधाके उत्कृष्ट खेलाडीहे विधागत रूपमे ट्रफीसहित नगद १० हजार पुरस्कार डेजाइ ।
सुदूरपश्चिम प्रदेशके पर्यटन प्रवद्र्धन करना, नगर क्षेत्रमे खेलकुदके चहलपहल बह्रैना, व्यावसायिक खेलाडी बनैना तथा युवाहे खेलकुदमे लग्ना अभिप्रेरित करेक लाग प्रतियोगिता करटिरहल क्लबके अध्यक्ष दिनेश कलेल जानकारी डेलैं ।
प्रतियोगिताके मुख्य प्रायोजकमे जगदम्बा ईन्टरप्राईजेजके उत्पादन जगशक्ति गोल्ड टिएमटी फलामे छड रहल बा । मुख्य प्रवद्र्धकमे गौरीगंगा नगरपालिका, सुदूरपश्चिम प्रदेश खेलकुद परिषद्, राष्ट्रिय खेलकुद परिषद्, नेपाल टेलिकम रहल बा । प्रतियोगिताके प्रायोजकमे सिराज ईन्टरनेशनल, न्यु प्लानेट इन्जिनियरिङ, केवी सौगात क्लिनिक ओ वेष्टन लिकर्स रहल बा ।
