बाजुराके रानीवन क्लब क्वाटर फाइनलमे
पहुरा समाचारदाता
धनगढी, २३ चैत । रानीवन क्लब बाजुरा तेस्रो सुदूरपश्चिम गौरीगङ्गा गोल्ड कपके क्वाटर फाइनलमे प्रवेश करले बा । कैलालीके गौरीगङ्गामे जारी जग शक्ति गोल्ड टिएमटी तेस्रो सुदूरपश्चिम गौरीगङ्गा गोल्ड कप अन्तरगत बिफेक रोज हुइल खेलमे नेपाल पुलिसके टीमहे २–१ गोल अन्तरसे पराजित कैके रानीवन क्वाटर फाइनलमे स्थान पक्का करल हो ।
खेल सुरु हुइल २ मिनेटमे गौरव रावतके सुन्दर हेडर गोल मार्फत बाजुरासे अग्रता लेहल रहे । ४० औँ मिनेटमे दिनेश रेग्मी एक गोल थपेबर पहिल हाफमे बाजुरासे २–० के अग्रता बनाइल रहे । पुलिसके ओरसे खेलके ५३ औँ मिनेटमे चक्र बलायर गोल कैना सफल हुइलेसे फेन ओकरपाछे पुलिस खेलमे फर्के नैसेकके प्रतियोगितासे नक आउट हुइ पुगल रहे । खेलके प्लेयर अफ दी म्याच रानीवन क्लब बाजुराके मिलन रेग्मी चुनल रहिट ।
प्रतियोगिता अन्तरगत शुकके बर्दिया ओ कञ्चनपुरके टीम प्रतिस्पर्धा कैना बाटै । ‘खेलौँ फुटबल रमेर, खेलकुदको सन्देश, शान्ति स्थायित्व र एकताबद्ध देश’ कना नाराके साथ गौरीगङ्गा–११ स्पोर्टस् क्लबसे आयोजना करल प्रतियोगिता चैत ३० गतेसम सञ्चालन हुइना बा ।
प्रतियोगितामे १० टीमके सहभागिता रहल बा । आयोजक गौरीगंगा–११ सँगे कैलाली, कञ्चनपुर, डोटी, बाजुरा, बांके, बर्दिया, नवलपरासी जिल्लाका टीमके साथे नेपाल पुलिस ओ शसस्त्र प्रहरी बलके टीमके सहभागीता रहल बा ।
प्रतियोगिताके विजेताहे ट्रफी सहित नगद ४ लाख ओ उपविजेताहे ट्रफी सहित नगद २ लाख पुरस्कार प्रदान करजैना बा कलेसे सर्वोत्कृष्ट खेलाडीहे नगद ५० हजार प्रदान करजैना आयोजक जनैले बा । साथे सर्वाधिक गोलकर्ता, उत्कृष्ट गोलरक्षक लगायत टमान विद्याके उत्कृष्ट खेलाडीहे विधागत रुपमे ट्रफी सहित नगद १० हजार पुरस्कार डेजैना बा ।
प्रतियोगिताके ‘म्यान अफ द म्याच’ हे ट्रफी सहित नगद ५ हजार प्रदान करजैना आयोजक जनैले बा । सुदूरपश्चिम प्रदेशके पर्यटन प्रबद्र्धधन कैना, नगर क्षेत्रमे खेलकूदके चहलपहल बह्रैना, व्यवसायीक खेलाडी उत्पादन तथा युवाहे खेलकूदमे लग्ना अभिप्रेरित करक लाग प्रतियोगिता करटी रहल क्लबके अध्यक्ष दिनेश कलेल जानकारी डेलै ।
प्रतियोगिताके मुख्य प्रायोजकमा जगदम्बा ईन्टरप्राईजेजके उत्पादन जग शक्ति गोल्ड टिएमटी फलामे छड रहल बा । मुख्य प्रवर्द्धकमे गौरीगङ्गा नगरपालिका, सुदूरपश्चिम प्रदेश खेलकुद परिषद्, राष्ट्रिय खेलकुद परिषद्, नेपाल टेलिकम रहल बावै । प्रतियोगिताके प्रायोजकमे सिराज ईन्टरनेशनल, न्यु प्लानेट इन्जिनियरिङ, केवी सौगात क्लिनिक ओ वेष्टन लिकर्स रहल बावै ।
