स्वास्थ्य समस्या नुकैना अपनहे रोगी बनैना होः गाउँपालिका उपाध्यक्ष

पहुरा | २३ चैत्र २०७९, बिहीबार

0 Shares

पहुरा समाचारदाता
हसुलिया, २४ चैत । कैलाली जिल्ला कैलारी गाउँपालिकाके उपाध्यक्ष भगवतीकुमारी चौधरी स्वास्थ्य समस्या नुकैना अपनहे रोगी बनैना रहल बटैले बटी ।

कैलारी गाउंपालिकाके स्वास्थ्य शाखा, ओरेक नेपाल ओ सहास नेपालके सयुक्त सहकार्यमे चार ठो वडामे संचालन कैगिल १० वर्ष पाछेसम विल्गाई सेक्ना सम्भावित पाठेघरके मुखके क्यान्सर परिक्षण सेवाके निशुल्क शिविर समापन कार्यक्रममे बोल्टी उहाँ उ बाट बत्वाइल रहिट ।

कार्यक्रममे वडका पहुना समेट रहल उहाँ महिलाहुकनके जिम्मेवारी पुरुषसे ढेर रहल कारण महिला अपन स्वास्थ्य समस्या नुकाके बैठना बाध्य रहल बटैली । महिलाहुकनहे घरपरिवारके सारा बोझा बोके पर्ना अवस्था रहठ,’ गाउँपालिका उपाध्यक्ष कहली, ‘एक ठो महिला कौनो कार्यालयमे कर्मचारी हो कलेसे सकारे उठके खाना पकैना, कार्यालय जैना, साँझके घर आइलपाछे फेरसे खाना पकैना, लर्कन स्याहार कैना, खाना खवैनालगायत सारा बोझ झेले परठ । घरके कामके चापसे महिला अपनहे स्याहार करे नैपाइल हुइट । समयमे स्वास्थ्य परिक्षणफे करे नइसेक्ना अवस्था बा ।’

कैलारीमे पाठेघर गिरना, यौन तथा प्रजनन स्वास्थ्यके ढेर समस्या डेखल उहाँ बटैली । यिहीहे पालिका गम्भीर रुपमे लेले बा । महिलाहुक्रन काम केल नाही अपन स्वास्थ्यमे ध्यान डेना उहाँ आग्रह करली ।

ओरेक नेपालके केन्द्रीय सदस्य संगीता अधिकारी गाउँघरके महिलाहुक्रे खुल्के अपन स्वास्थ्य समस्याके बाट धारे नइसेकल बटैली । चार दिनके शिविर संचालनमे ओ सहभागीहुकनके बाटचित करेबेर महिलाहुक्रे बहुट हिंसा भोगल समस्या सुनाइल उहाँ बटैली । घरके कामके बोझसे महिलाके स्वास्थ्य विगरल उहाँ बटैली । उहाँ कहली, सबसे पहिले अपनहे माया करी, स्वास्थ्य रहीटे और काम करे सेकब ।

ओस्टेक कैलारी गाउँपालिकाके स्वास्थ्य शाखा प्रमुख नरेशकुमार चौधरी महिलाहुकनके स्वास्थ्यमे पहुँच पुगाइक लाग पालिकासे निशुल्क शिविर संचालन करल बटैलै । उहाँ कहलै, पाठेघरके समस्या रहल महिला टमान डेखा परलै । यौन तथा प्रजनन रोगके समस्याफे यहाँ जटिल रहल बा । यी समस्या निराकरणके लाग पालिका अइना दिनमे बजेट विनियोजना करटी निरन्तरता दि ।

वडा नम्बर ३ के कार्यवाहक अध्यक्ष किसनलाल चौधरीके अध्यक्षतामे हुइल कार्यक्रमके संचालन कैलारी गाउँपालिकाके स्वास्थ्य शाखाके सिअनमी निरिक्षक अनिता चौधरी करले रहिट ।

कार्यक्रममे वडा नम्बर ३ के वडा सदस्य शकुन्तला चौधरी, ओरेक नेपालके जिल्ला संयोजक विनु रानालगायत ओरेक नेपालके टिम, सहास नेपाल कैलालीके कार्यक्रम अधिकृत सरिता चौधरी, टमान स्वास्थ्यकर्मीहुकनके सहभागिता रहल रहे ।
चैत २० गतेसे सुरु हुइल शिविरमे महिलाके पाठेघरके मुखके क्यान्सर परीक्षण सेवा, महिलाहुकनमे विल्गैना तमान यौन संक्रमण सम्बन्धी परीक्षण, सल्लाह एवं लाक्षणिक उपचार सेवा, पाठेघर गिरल महिलाहुकनके स्क्रिनिङ तथा रिंगपेसरी सेवा, परिवार नियोजन सम्बन्धी परामर्श तथा आइयूसीडि÷ईम्प्लाण्ट सहितअस्थायी साधन सेवा डेहल ओरेक नेपालके जिल्ला संयोजक विनु राना बटैली । शिविरमे महिला रोग विशेषज्ञ डा. रोजी शर्मालयातके हुकान टिम उपचार कैले रहिट ।

ओस्टेक करके सहास नेपालके कार्यक्रम अधिकृत सरिता चौधरी गाउँघरमे पैना घरेलु दवाई पठरचट्टी, बरमसिया फुला, आमक बोक्ला, तुल्सी पटिया, घिउकुमारी, घोरटाप, बजके महत्वबारे जानकारी डेहल रहिट । पठरचट्टी पठरीके डवाई, बरमसिया फुलाके डवाई सुगर, आमक बोक्ला पाठेघर गिरना डवाइ, तुल्सी सरदी दवाई, नीम महिलाके सेतो पानी बहना, गर्मी, प्रेसरके डवाइ, घिउ कुमारी प्रेसरके डवाई, घोरटाप पिसाब पोल्नके डवाइ, बज सरदीके डवाइ रहल बटैली ।

ओस्टेक शिविरमे महिलाके भुमिकाबारे मै के हु, छावाछाई कैसिक हुइना, समाज महिलाहुकनके का कहिके चिन्हठ, मौनता तुरी, महिलाके भुमिका, कामके असमान विभाजन, महिलाके स्याहारमुलक भुमिका, परम्परागत रुपमे समाजसे पुरुषके भुमिका, महिलाहुक्रे घरबाहेर कैना काम, सामाजिक हिंसा, मानसिक हिंसा, धार्मिक रुपसे कैना हिंसा, कानूनी लैङिक रुपसे कैना हिंसा, कामके बोझसे महिलाके स्वास्थ्य समस्या, पाठेघर गिरना कारण, ढाड कम्मर बठैना, उप्परके पेट बठैना, मुरी बठैना, चक्कर अइना, महिलाके प्रजनन प्रणालीके अंग लगायतमे सहभागीहुकनके प्रशिक्षण डेहल बा ।