कैलारीमे १९ जनहनमे पाठेघर गिर्ना समस्या

पहुरा समाचारदाता
हसुलिया, २४ चैत । कैलालीके कैलारी गाउँपालिकामे १९ जनहनमे पाठेघर (बच्चादानी) गिरना समस्या डेखल बा ।

कैलारी गाउंपालिकाके स्वास्थ्य शाखा, ओरेक नेपाल ओ सहास नेपालके सयुक्त सहकार्यमे कैलारीके चार ठो वडामे कैगिल १० वर्ष पाछेसम विल्गाई सेक्ना सम्भावित पाठेघरके मुखके क्यान्सर परिक्षण सेवाके निशुल्क शिविरमे १९ जनहनमे पाठेघर (बच्चादानी) गिरना समस्या डेखल हो ।

चैत २० गते रतनपुरमे आयोजना कैगिल निशुल्क शिविरमे १ सय ६९ जाने, २१ गते उदासीपुरमे १ सय ३२ जाने, २२ गते गदरीयामे १ सय ९२ जाने ओ २३ गते हसुलिया स्वास्थ्य चौकी टिसेन कैलालीमे हुइल निशुल्क शिविरमे १ सय १९ करके जम्मा ५ सय ७२ जाने सेवा लेहल रहिट ।

ओम्नेसे पाठेघरके मुखके जाँच ३ सय ६३ जाने, पाठेघर (बच्चादानी) गिरेक डारे ११ जनहनमे रिङपेसरी डारल, आठ जानेक पाठेघर गिरना अवस्था कर्रा हुके अप्रेशनके लाग सेती प्रादेशिक अस्पताल धनगढी रिफर कैगिल ओरेक नेपाल कैलालीके वरिष्ठ कार्यक्रम अधिकृत गीता चौधरी बटैलै ।

पाठेघर गिरना समस्याहुके रिफर हुइल आठ जाने मन्से २ जाने बायोबृद्ध रहल उहाँ बटैलै । एक जानेक ८२ बरस ओ दुसर ८६ बरस उमेर पुगल बा । ओइनके शारिरीक अवस्था कम्जोर, बुह्रागैल ओरसे अप्रेशन सम्भव नइहुइना अप्रेशन करलेसे आउर जोखिम हुइनाहसक डेखल उहाँ जनैली ।

छोटमे भोज हुइना, शरिर परिपक्वा विन कामके बोझ बह्रल, ढेर बच्चा जन्माइल, स्वास्थ्य परिक्षण नइकैना, गर्भवती सुत्केरी अवस्थामे पोषिलो खाना नइपाइल, आराम करे नइपैना, सुत्केरी, गर्भवतीके बेला गोस्यासे अनइच्छित शारिरीक सम्पर्क हुइलपाछे ओइनके पाठेघरके समस्या डेखल उहाँ जनैली ।

अस्पतालमे डक्टरुवा पुरुष रना, अस्पतालमे गैलबेला खुलके बाट करे नइसेक्ना, पायक पर्ना लग्गे अस्पतालमे नइरना, और जनहनसे समस्याके बाट धारेबेर व्यक्तिगत चिज काहे डेखैठे कना गोस्यासे डबाब डेहल कारण कोई १५ बर्षसे, टे कोई २५ बर्षसे यी समस्या भोग्टी उहाँ जनैली ।

ओस्टेक १ सय ९० जनहनमे यौन तथा प्रजजन रोगके संक्रमण डेखा परल उहाँ बटैली । यौन तथा प्रजजन रोगके संक्रमण ढेर डेखल कारण समयमे उपचार नइकरलेसे पाठेघर (बच्चादानी)मे समस्या डेखजाई,’ वरिष्ठ कार्यक्रम अधिकृत कहली, ‘कैलारी गाउँपालिकामे यौन तथा प्रजजन रोग सम्बन्धी जनचेतनामुलक कार्यक्रम कैना आवश्यक विल्गाइल । यहाँ यौन तथा प्रजजन रोग सम्बन्धी समस्या डेखल ओरसे संघ संस्था ओ स्थानीय सरकार जनचेतनामुलक कार्यक्रम करे पर्ना विल्गाइठ । कैलारी गाउँपालिकामे ९ ठो वडा रहल बा, सक्कु वडामे यी शिविर संचालन हुइलेसे और महिलाहुकनमे समस्या डेखाई सेकठ टबमारे पालिकासे और वडामे कार्यक्रम संचालन कैना जरुरी विल्गाइठ ।

कैलारी गाउँपालिकाके उपाध्यक्ष भगवतीकुमारी चौधरी कैलारीमे महिलाहुकनमे ढेर समस्या डेखल ओरसे बाँकी वडामे पाछेक दिनमे शिविर संचालन कैना बटैली । महिलाके पाठेघर समस्याबारे ढेर दिनपाछे स्वास्थ्य जाँच हुइल मने आर्थिक अवस्था कम्जोर रहुइया सुविधा पाइल बटैली ।