समाज रुपान्तरणके लाग ‘बातचित घर’
पहुरा समाचारदाता
धनगढी, २४ चैत । समाज रुपान्तरण कैना उद्देश्य सहित धनगढीमे ‘बातचित घर’ सञ्चालनमे आइल बा ।
बातचित घरके उद्घाटन सुदूरपश्चिम प्रदेश लोक सेवा आयोगके उपसचिव हिरालाल चौधरी करल रहिट । कार्यक्रमके बर्का पहुना समेत रहल उहाँ बातचित घरहे राजनीतिक, सामाजिक, साँस्कृतिक, आर्थिक लगायत टमान विषयबस्तुके छलफल तथा विचार विमर्श कैना प्लेटफर्मके रुपमे लेहल बटैलै ।
बातचित घरके सञ्चालक संयोजक तथा बरघर ठाकुर करिया प्रधान समसामायिक विषय वस्तुमे छलफलके लाग एक साझा मञ्चके विकास कैना उद्देश्यसे बातचित घर सञ्चालनमे लानल बटैलै । उहाँ बातचित घरसे थारू कला, साहित्य लेखन तथा सृजनाके बखान कैनाके साथे थारू समुदायमे रहल बौद्धिकताहे प्रर्वद्धन कैना मद्दत पुग्ना बटैलै ।
बातचित घर एक सामूहिक रुपमे छलफल, बातचित कैना एक बहुआयामिक साझा मञ्च हो । इ घरमे कलाकार, राजनितिज्ञ, पत्रकार, समाजसेवी, अर्थविद, कानुनविद, खोज, अनुसन्धानकर्ता, शिक्षाविद, साहित्यकार, समुदायिक नेता, किसान, जानकार ओ विद्यार्थीबिच छलफल, अन्तरिक्रया तथा वार्तालाप कैना जनाइल बा ।
धनगढी उपमहानगरपालिका वडा नम्बर ७, देवहरिया स्थित थारु छात्रबासमा स्थापना हुइल बातचित घरमे मासिक रुपमे कम्तिमे १ चो ओ आवश्यकता ओ समय अनुकुल नियमित कार्यक्रम कैना जनाइल बा ।
घरके किसन्वा तथा व्यवस्थापन संयोजक माधव थारू कार्यक्रममे उपस्थित पहुनाहुक्रनहे मनतब्य सहित स्वागत करल रहिट । कार्यक्रमके सञ्चालन अघरिया उन्नती चौधरी करले रही ।
कार्यक्रममे साहित्यिकार सागर कुश्मी, सानु चौधरी, लोक गायक राज चौधरी, निर्देशक चन्द्र चौधरी लगायत विद्यार्थीहुक्रे आपन रचना तथा गीत प्रस्तुत करल रहिट । कार्यक्रममे थारू वुद्धिजीवी, समाजसेवी, सञ्चारकर्मी, विद्यार्थी लगायतके उपस्थिति रहल रहे ।
