कैलारीके स्वास्थ्य नीतिबारे अन्तरक्रिया
समाचारदाता
हसुलिया, २८ चैत । कैलारी गाउँपालिको स्वास्थ्य नीतिबारे मंगरके रोज अन्तरक्रिया कार्यक्रम कैगिल बा ।
कैलारी गाउँपालिका स्वास्थ्य शाखाके आयोजना तथा ओरेक नेपाल, सहास नेपालके सहकार्यक्रमे हुइल कार्यक्रम गाउँपालिका अध्यक्ष राजसमझ चौधरीके अध्यक्षतामे हुइल रहे । कार्यक्रममे बोल्टी उहाँ कैलारीबासीके स्वास्थ्य समस्या समाधानके लाग पालिका सदैव तयार रहल बटैलै । उहाँ कहलै, पालिकाके कोइ विमारीहे रगतके आवश्यकता हुई कलेसे निशुल्क रगत डेना व्यवस्था करले बा ।
गर्भवती तथा सुत्केरीहे धनगढी और ठाउँ रिफर करलेसे निशुल्क एम्बुलेन्सके व्यवस्था करल बटैलै । कैलारीमे सिकलसेलके विमारी बहुट रहल ओरसे सिकलसेल जाँच सुरु करलफे उहाँ बटैलै ।
ओस्टेक गाउँपालिका उपाध्यक्ष भगवतीकुमारी चौधरी सुत्केरी महिलाके स्वास्थ्यमे ध्यान डेटी सुत्केरीहुकन पोषणके लाग कोसेली प्रदान करटी आइल बटैली । ओस्टेक करके पाठेघरके मुहके परिक्षण तथा प्रजनन स्वास्थ्य सम्बन्धी एकिकृत स्वास्थ्य शिविरके समिक्षा करल रहे । चार ठाउँमे संचालन हुइल उ शिविर कैलारी गाउँपालिकामे १९ जनहनमे पाठेघर (बच्चादानी) गिरना समस्या डेखल रहे ।
कैलारी गाउंपालिकाके स्वास्थ्य शाखाके प्रमुख नरेश चौधरीके अनुसार चैत २० गते रतनपुरमे आयोजना कैगिल निशुल्क शिविरमे १ सय ६९ जाने, २१ गते उदासीपुरमे १ सय ३२ जाने, २२ गते गदरीयामे १ सय ९२ जाने ओ २३ गते हसुलिया स्वास्थ्य चौकी टिसेन कैलालीमे हुइल निशुल्क शिविरमे १ सय १९ करके जम्मा ५ सय ७२ जाने सेवा लेहल रहिट । कार्यक्रममे कैलारी गाउँपालिकाके प्रमुख प्रशासकीय अधिकृत विर बहादुर ऐर, गाउँपालिका प्रवक्ता दिपेन्द्र बम लगागतके टमान वडा अध्यक्ष, स्वास्थ्य शाखाके कर्मचारी, ओरेक नेपाल कैलालीके वरिष्ठ कार्यक्रम अधिकृत गीता चौधरी, सहास नेपालके कार्यक्रम अधिकृत सरिता चौधरीलगायतके सहभागिता रहे ।
