भूमिहीनके लाग घर निर्माण
पहुरा समाचारदाता
धनगढी, २८ चैत । कञ्चनपुरके वेदकोट नगरपालिका–५, धरमपुरमे सिमान्तकृत भूमिहीन, दलित तथा मुक्त कमैयाँ परिवारके लाग घर निर्माण हुइल बा ।
सुदूरपश्चिम प्रदेश मुख्यमन्त्री सुरक्षित आवास कार्यक्रमअन्तर्गत धरमपुरमे २५ ठो नयाँ घर निर्माण हुइल बटै । धरमपुरमे यी आघे १८ ठो घर निर्माण हुसेकल बा । मुख्यमन्त्री सुरक्षित आवास कार्यक्रम अन्तर्गत धरमपुरमे ८४ ठो घर निर्माण हुइना बटाइल बा । दुई कोठा, एक बरण्डा ओ शौचालय ओ जस्तापाताके छानासहितके पक्की घर निर्माणमे प्रदेश सरकार, ह्याविट्याट फर ह्युमिनिटी नेपाल ओ राष्ट्रिय दलित नेटवर्क (आरडिएन) आर्थिक तथा प्राविधिक सहयोग रहल बा ।
प्रत्येक घर निर्माणके लाग प्रदेश सरकारसे चार लाख एक हजार रुप्या अनुदान डेले बा । कलेसे राष्ट्रिय दलित नेटवर्क ओ ह्याविट्याट फर ह्युमिनिटी नेपालके एकमुष्ट २६ लाख रुप्या ओ प्राविधिक सहयोग तथा सामाजिक परिचालन सहयोग रहल बा ।
ओस्टेक, समुदायसे अदक्ष कामदार ओ स्थानीय स्रोत साधन योगदान रहल बा । धरमपुरमे आवास घर निर्माणके २०७७ साल पुससे सुरु हुइल रहे । एक वर्षभिटर काम पुरा कैना करके ठेक्का सम्झौता हुइलेसेफे गैल फागुनमे २५ ठो घर निर्माण हुइल बटै ।
धरमपुरमे मुख्यमन्त्री सुरक्षित आवास कार्यक्रमके मंगरके रोज करल सामाजिक लेखापरीक्षण कार्यक्रममे भूमि व्यवस्था, कृषि तथा सहकारी मन्त्रालयके अधिकृत धर्मराज ओझा धरमपुरमे भूमिहिन, दलित तथा मुक्त कमैयाँके लाग आवास घर निर्माणके लाग प्रदेश सरकारसे एक करोड १६ लाख रुप्यामे ठेक्का सम्झौता करल जानकारी डेलै । उहाँ निर्माण कम्पनीसे ढिलाई करल कारण घर निर्माण कार्यमे एक वर्ष ढेर समय लागल बटैलै ।
उहाँ धरमपुरमे नमुना वस्ती निर्माणके लाग जनता स्वयंफे अग्रसर हुइना आग्रह करलै । उहाँ कहलै, ‘श्रमदानसे घरप्रति अपनेहुकनके स्वामित्व भाव बह्री । सरकारसे जग्गा धनी पुर्जा फे धरमपुरसे सुरुवात करी । उहाँ वस्तीमे सडक, पानी, विद्युत लगायतके सुविधाके प्रबन्ध स्थानीय सरकारसे कैना विश्वास व्यक्त करलै ।
सामाजिक लेखापरीक्षणमे वडा ५ के अध्यक्ष चित्रदेव भट्ट प्रत्येक घरमे भान्सा कोठाकेफे व्यवस्था कैना आश्वासन डेलै । उहाँ वस्तीमे माटी भरान, खानेपानीके लाग तत्काल डिप बोरिङ जडान तथा रोजगारीके लाग सीपमुलक तालिम कार्यक्रम सञ्चालन कैना बटैलै ।
वडा ५ के निवर्तमान अध्यक्ष गणेश विक १५÷१६ वर्षसे अव्यवस्थित रुपमे बसोबास करटी रहल भूमिहीन, सुकुम्बासी, दलित तथा मुक्त कमैयाँहुकनहे व्यवस्थित कैना प्रयास स्वरुप आवास निर्माण कार्यक्रम सञ्चालन हुइल बटैलै ।
उहाँ वस्तीके लाग शुद्ध खानेपानी सुविधा पुगैना खानेपानी योजना निर्माण हुइटी रहल ओ कुछ समयभिटर पानी वितरण हुइना बटैलै ।
आरडिएनके महासचिव मोहन वड वस्तीमे खानेपानी, सडक, शिक्षा, स्वास्थ्य तथा रोजगारीके लाग पहल कैना बटैैलै । उहाँ आरडिएनसे प्रदेश तथा स्थानीय सरकार, ह्याविट्याट तथा समुदायसँगके समन्वय ओ सहकायमे नमुना वस्ती निर्माणके लाग पहल करटी रहल बटैलै ।
ह्याविट्याट फर ह्युमिनिटी नेपालके कार्यक्रम अधिकृत राममणी चौधरी ८४ मन्से हालसम ४३ ठो घर निर्माण हुसेकल ओ सक्कु घर भूकम्प प्रतिरोधी, हावाहुरी प्रतिरोधी ओ आगलागीके जोखिममुक्त रहल बटैैलै ।
सामाजिक लेखा परीक्षणमे सहभागीहुक्रे वस्तीमे रहल रुखुवाके कारण जोखिम रहल, डुबानके समस्या रहल, खानेपानीके अभाव, भान्साकोठाके समस्या लगायतके समस्या प्रस्तुत करल रहिट । सहभागीहुक्रे अनिता डँगौरा, रतिलाल डँगौरा, सिमा डँगौरा लगायतसे जग्गा धनी पुर्जा हाली वितरण कैना तथा सडक लगायतके समस्या सम्बोधन कैना आग्रह करलै ।
कार्यक्रमके सञ्चालन आरडिएनके कार्यक्रम अधिकृत नित्यानन्द जोशी करले रहिट । उहाँ कुछ दिनभिटरे घर औपचारिक रुपमे धरधनीहे हस्तान्तरण कैना जानकारी डेलै । कार्यक्रम बडघर बालमति चौधरीके अध्यक्षतामे हुइल रहे ।
