यौन तथा प्रजनन् स्वास्थ्य शिक्षामे जोड
पहुरा समाचारदाता
धनगढी, ३० चैत । यौन तथा प्रजनन् स्वास्थ्यबारे स्कूल लेभलसे विद्यार्थीनहे बुझाइ पर्ना आवश्यक रहल जोड डेहल बा ।
सक्कु जनहनके लाग वृहत यौनिकता शिक्षा नारा सहित कैलाली ओ कञ्चनपुरमे लागु हुइल राइट हियर राइट नाउ २ परियोजनाबारे बिफेक रोज धनगढीमे हुइल कार्यक्रमके सहभागी ओइसीन बटाइल हुइट ।
गोदावरी नगरपालिकाके नगर उपप्रमुख सारदा रोकाया यौन तथा प्रजजन् स्वास्थ्य शिक्षा बारे स्कूलके शिक्षक खुलके पह्राइ पर्ना जोड डेली । स्कूलमे शिक्षकहुक्रे खुलके नै पह्रैना हुइल ओरसे विद्यार्थीहुक्रे यौन बारे ढेर जानकार नैरहल उपप्रमुख रोकाया बटैली ।
‘स्कूल लेभलके कितावमे यौन शिक्षाबारे पाठ्यक्रममे रहठ् मने शिक्षकहुक्रे उ विषयबस्तुहे महत्व नैडेके पह्रैना करठै । कोइ शिक्षक टे आउर लाजमानके उ च्याप्टरहे नैछुके, विद्यार्थीनहे अपनही पह्रे लगैना करठै’, उहाँ कहली–‘उ मेरके शिक्षकहुक्रनके पह्रैना तरिकासे विद्यार्थीहुक्रे यौन तथा प्रजनन् स्वास्थ्यबारे जानकार नैहुइना ओ विद्यार्थीनमे नकारात्मक सोँचाइके विकास फेन हुइना करठ् ।’
कार्यक्रमके सहभागी यौन तथा यौनिकता बारे घर समुदाय, स्कूल कलेजमे व्यापक रुपमे बहस हुइना फेन जरुरी रहल औँल्याइल रहिट ।
दुर्गा बहुमुखी क्याम्पस अत्तरियाके अध्यक्ष गणेश शाह हमार पितृसत्तात्मक सोँचाइके कारण यौन तथा यौनिकताबारे आभिनसम हमार समाज आभिन फेन खुले नैसेकल बटैलै ।
‘हमार समाज आभिनसम पितृसत्तात्मक सोचाइसे गुज्रटी रहल बा’, उहाँ कहलै–‘घर समाज, स्कूल कलेजमे जौन मेरके यौन प्रजजन् स्वास्थ्यबारे बहस हुइ पर्ना हो उ मेरके हुइ नैसेकल हो । यौन तथा प्रजनन् स्वास्थ्यबारे ढेर बहस हुइना जरुरी रहल बा ।’
राइट हियर राइट नाउ २ के कार्यालय संयोजक राजेन्द्र महर्जन परियोजनाके उद्देश्यबारे जानकारी कराइल रहिट । उहाँ राइट हियर राइट नाउ परियोजना सक्कु वर्गके युवा आपन यौन तथा प्रजनन् स्वास्थ्य ओ अधिकारके प्रत्याभूति लेटी बाँचे पैना ओ लैगिंक न्यायके प्रर्वद्धन कैना समाज निर्माण करक लाग स्थापना हुइल बटैलै ।
ओस्टके उहाँ वृहत यौनिकता शिक्षाके पैरवीके लाग आधारभूत, स्थानीय, संघीय ओ अन्तराष्ट्रिय स्तरमे काम कैटी रहल जानकारी डेटी स्थानीय तहमे शिक्षा कक्षा, क्षमता वृद्धि कार्यक्रम, वृहत यौनिकता शिक्षाके क्षेत्रमे स्थानीय सरकारके बजेट बनाइक लाग पैरवी कैना बटैलै ।
कार्यक्रममे विकासका लागि यूवा ऐक्यवद्धता(यार्ड)के अध्यक्ष स्माइल चौधरी संस्था तथा परियोजनाबारे जानकारी कराइल रहिट । कार्यक्रम सहजीकरण यार्डके महेन्द्र शाही करल रहिट ।
कार्यक्रममे जनप्रतिनीधी, सरकारी तथा गैरसरकारी संघसंस्थाके प्रतिनीधी, स्कूल कलेजके विद्यार्थी, सञ्चारकर्मीनके सहभागिता रहल रहे ।
