लौवा बरस २०८० के शुभकामना
मुलुक एक अध्याय पार करके औरे अध्याय २०८० सालमे पाइला टेक्ले बा । २०७९ सालमे स्थानीय चुनाव, प्रदेश ओ संघके चुनाव हुईल ओरसे चहलपहल ढेर रहल । जनता अपन चाहल जनप्रतिनिधि छनौट करलै । स्थानीय, प्रदेश ओ संघके चुनावमे नइसोचल राजनितिक परिवर्तन हुइल । तीनु तहमे चुनावसे लौवा अनुहारके प्रवेश हुइल । ढेर बरससे राजनिति करल, नाउँ चलल राजनितिकर्मीहे जनता विदाई करटी लौवा जनप्रतिनिधिहुकनके आगमन करैलै ।
जनता अपन पठाइल जनप्रतिनिधिहुकन मार्फत विकास हुइनामे ढेर विश्वास कैले बटै । स्थानीय जनप्रतिनिधिहुकनके काम कैलक करिब ११ महिना हुइ पुगल बा । प्रदेश ओ संघके प्रतिनिधि अभिन काम करे नइपाइल हुइट । प्रदेश ओ संघमे मन्त्री मण्डल पूर्णता नइपाइल हो । जेकर कारण विकासफे हुइल नइडेखल हो । संघीयता कार्यान्वयनपाछे मुलुकमे दुसर कार्यकाल सुरुवाटी चरणमे बा । दुसर कार्यकाल सुरुवाट हुइटी बेला अब्बे आर्थिक मण्डीफे सुरुवाट हुइल बा । व्यापारी, व्यावसायी निराश डेखल बटै । जेकर असर माध्यम वर्गी ओ न्यून वर्गियमे ढेर डेखा परल बा । चालु आर्थिक वर्ष २०७९/८० मे सरकारसे १७ खर्ब ९३ अर्ब ८३ करोड रुप्याके बजेट कार्यान्वयन करटी रहल बा । आर्थिक वर्ष २०७७/७८ मे १३ खर्ब ९८ अर्ब रुप्याके व्यापार घाटा रहे । उ आवमे आयात १५ खर्ब ३९ अर्बके हुईबेर निर्यात १ खर्ब ४१ अर्ब रुप्या हुइल रहे ।
नेपालसे यी वर्ष निर्यातमे नयाँ कीर्तिमान रख्ले बा । गैल आर्थिक वर्ष २०७७/७८ मे १ खर्ब ४१ अर्ब रुप्याके निर्यात करके कीर्तिमान राखल नेपालसे आर्थिक वर्ष २०७८/७९ मे भर ४१.७४ प्रतिशत ढेर निर्यात करटी नयाँ कीर्तिमान कायम करले बा । यी वर्ष निर्यात २ खर्ब ३ करोड रुप्याके निर्यात हुइल बा । यिहीसे व्यापारके हिस्सामन्से निर्यातके ‘भ्यालु’ १२.३६ प्रतिशतसे वृद्धि हुइल बा । मने, आयातमे समेत गत आवके तुलनामे २४.७२ प्रतिशतके वृद्धि हुके व्यापार घाटामे सुधार हुई नइसेकल ।
मुलुकमे पहिले टमान जैसिन यूवा हुक्का, गाँजा, भाङ खाके विगरल रहिट । कलेसे अब्बेक यूवा पिढी लागु औषध ड्रक्स (खैरो हिरोइन), चरेश खैना ओ सुघनामे झिस्कल बटै । प्रहरीके तथ्याङक हेरेबेर लागु औषध प्रयोगकर्ता यूवा दैनिक पक्राउ परटी बटै । देशके विकासमे लग्ना ढेर यूवा लागु औषधके कुलटमे फस्टै । औरे मुलुक शिक्षा, स्वास्थ्यमे फडको मरटी आघेक बह्रटी रहल ओरसे अब्बे यहाँफे आधुनिक ओ प्राविधिक शिक्षाके माग बह्रल बा । टबमारे २०७९ साल जा–जैसिन गैलेसेफे मजा कामहे निरन्तरता दि ओ कमिकम्जोरी हुइलकलेसे सच्याके बह्री कना हार्दिक शुभकामना बा ।
