कैलारीमे व्यक्तिगत घटना दर्ता सप्ताह सुरु
पहुरा समाचारदाता
हसुलिया, ३ बैशाख । व्यक्तिगत घटना दर्ता सप्ताह अर्न्तगत कैलालीके कैलारी गाउँपालिकामे फेन व्यक्तिगत घटना दर्ता सप्ताह सुरु हुइल बा ।
गाउँपालिकाके वडा नम्बर ६ ओ ९ मे व्यक्तिगत घटना दर्ताबारे प्रभातफेरी ओ अन्तरक्रिया कार्यक्रम करगिल बा । वडा नम्बर ६ के वडा अध्यक्ष प्रेमबहादुर चौधरीके अध्यक्षतामे हुइल कार्यक्रममे पञ्जीकरण शाखा प्रमुख दयाराम चौधरी कार्यक्रमके उद्देश्यबारे जानकारी कराइल रहिट ।
वडा सचिव अनन्त राम कडेल सहभागीहुक्रनहे व्यक्तिगत घटना दर्ताबारे जानकारी कराइल रहिट । उहाँ व्यक्तिके कानुनी पहिचान ओ राज्यसे प्रवाह हुइना टमान सेवा प्राप्तीके लाग जन्म, मृत्यु, विवाह, बसाइँसराइ, सम्बन्ध विच्छेद लगायतके व्यक्तिगत घटना घटना घटल ३५ दिन भित्रे आपन वडा कार्यालयमे दर्ता कैना आग्रह करल रहिट । ओस्टके उहाँ सामाजिक सुरक्षाके बारेम फेन जानकारी कराइल रहिट ।
उहे दिन वडा नम्बर ९ मे फेन उक्त कार्यक्रम हुइल बा । वडा सदस्य धनबहादुर रानाके अध्यक्षतामे हुइल कार्यक्रममे वडा सचिव ठागुराम चौधरी व्यक्तिगत घटना दर्ताबारे जानकारी कराइल रहिट ।
कार्यक्रममे जनप्रतिनीधी, बरघर भलमन्सा, स्वाथ्य चौकी शाखा प्रमुख, महिला स्वास्थ्य स्वयम सेविका, फिल्ड सहायक अनुषा चौधरी, निलम चौधरी लगायतके उपस्थिति रहल रहे ।
नेपाल सरकार तथा गृह मन्त्रालय राष्ट्रिय परिचयपत्र तथा पञ्जीकरण विभाग अन्र्तगत बैशाख १ गतेसे ७ गतेसम व्यक्तिगत घटना दर्ता सप्ताह सक्कु स्थानीय तहमे सञ्चालन हुइल बा ।
व्यक्तिके कानूनी पहिचान स्थापित कैना, राज्यहे नीति निर्माण कैना ओ राज्यसे प्रवाह हुइना सेवा प्राप्तीके लाग व्यक्तिगत घटना दर्ता आवश्यक रहल ओरसे उ सम्बन्धी जनचेतना अभिवृद्धि करक लाग प्रत्येक बरस बैशाख महिनाके पहिल अँठ्वार व्यक्तिगत घटना दर्ता सप्ताह मनैटी आइल बा ।
