कैलारीके कृषि पकेट कार्यक्रम लागु हुइना

पहुरा समाचारदाता
हसुलिया, ३ बैशाख । कैलाली जिल्ला कैलारी गाउँपालिकाके सक्कु वडामे कृषि पकेट कार्यक्रम लागु कैना जनागिल बा ।

युएसएडके आर्थिक सहयोगमे किसान–२ परियोजना अन्र्तगत कैलारीके सक्कु वडामे कृषि पकेट कार्यक्रम लाग कैना जनागिल हो । गाउँपालिका अध्यक्ष राजसमझ चौधरीके अध्यक्षतामे अँटवारके रोज हुइल कृषि सम्बन्धी योजना तर्जुमा कार्यक्रममे ३ ठो वडामे टिना पकेट कार्यक्रम ओ ६ ठो वडामे धान पकेट कार्यक्रम लागु हुइना बा ।

पाँच बरसके लाग कृषि पकेट कार्यक्रम लागु हुइटी रहल ओरसे टिना ओ धान खेतीके कार्यक्रम पालिक पाला अडलबडलफे कैना उहाँ बटैलै । यी पालिका टिना ओ धानखेतीके लाग उर्वर भुमिके रुपमे रहल ओरसे मजासे टिना ओ धानखेती करलेसे आर्थिक स्रोतमे बृद्धि करे सेक्ना बटैलै ।

टिना ओ धान पकेट कार्यक्रमहे सफल बनैना सक्कु जनहनहे मेहनतके साथ लग्नाफे उहाँ आग्रह करलै ।
कैलारी गाउँपालिकाके ३, ४ ओ ७ नम्बर वडामे टिना खेती ओ वडा नम्बर १,२,५,६,८ ओ ९ मे धानखेतीके पकेट कार्यक्रम लागु हुइना किसान–२ परियोजनाके उत्तम ढकाल बटैलै ।

टिना ओ धान खेतीके लग्ना बजेटबारे छलफल हुइल रहे । छलफल कार्यक्रममे कैलारी गाउँपालिकाके उपाध्यक्ष भगवतीकुमारी चौधरी, कैलारी गाउँपालिका–५ के वडा अध्यक्ष तथा आर्थिक विकास संयोजक विष्णुप्रसाद चौधरी, किसान–२ परियोजनाके जनक आचार्य, पुष्पा जोशी, कैलारी गाउँपालिकाके सामाजिक विकास शाखा प्रमुख यगम कलेल, योजना शाखा प्रमुख सन्तोषकुमार चौधरी, कैलारी गाउँपालिकाके पशु चिकित्सक सुर्य प्रसाद चौधरी, कृषि शाखा प्रमुख मैया चौधरी, ना.प्र.स. बसन्ती चौधरी लगायतके सहभागिता रहे ।