कैलारीमे सिकलसेल रोग पहिचान शिविर संचालन
२०२ जानेक परिक्षण करेबेर १८ मे पोजेटिभ
पहुरा समाचारदाता
धनगढी, ३ वैशाख । कैलाली जिल्लाके कैलारी गाउँपालिकामे निशुल्क सिकलसेल रोगक पहिचान शिविर सुरु हुइल बा ।
उ पालिकामे करिब ९६ प्रतिशत थारु समुदायके बसोबास रहल ओ थारु समुदायहुक्रे यी रोगसे ढेर प्रभावित हुइल ओरसे सिकलसेल रोगके पहिचान शिविर संचालन करे लागल कैलारी गाउँपालिकाके स्वास्थ्य शाखा प्रमुुख नरेशकुमार चौधरी बटैलै । यिहीसे आघे कैलारीके उदासीपुर प्राथमिक स्वास्थ्य केन्द्रमे सिकलसेल जाँच मेसिन धारके नियमित जाँच करटी आइल उहाँ बटैलै ।
स्वास्थ्य शाखा प्रमुख चौधरीके अनुसार यिहे बैशाख ३ गतेसे ६ गतेसम नौ वडामे रहल प्राथमिक स्वास्थ्य केन्द्र, स्वास्थ्य चौकीमे सिकलसेल रोगक पहिचान शिविर संचालनके आयोजना करे लागल जनैलै । पहिल रोज अँटवारके रोज बसौटी स्वास्थ्य चौकी उजलीसेमरामे कैगिल सिकलसेकल रोगके पहिचान शिविरमे ७० जानेक जाँच करेबेर ७ जनहनमे, हसुलिया स्वास्थ्य चौकी, टिसेनडाँडामे ५० जानेक जाँच करेबेर ७ जनहनमे ओ पवेरा स्वास्थ्य चौकीमे ८२ जानेक जाँच करेबेर ४ जनहनमे सिकलसेल पोजेटिभ डेखल स्वास्थ्य शाखा प्रमुख बटैलै । अँटवारके जाँच करल स्वास्थ्य चौकीमे आजफे जाँच कैना उहाँ बटैलै ।
ओस्टेक करके कैलारीके रतनपुर स्वास्थ्य चौकी बसन्ता, उदासीपुर प्राथमिक स्वास्थ्य केन्द्र, गदरिया स्वास्थ्य चौकी गदरिया बजारमे यिहे ५ ओ ६ गते सिकलसेकल रोगके पहिचान शिविर संचालन हुइना उहाँ बटैलै ।
कैलारी गाउँपालिकामे अब्बे ८८ जाने सिकलसेलके विमारी उपचारमे रहल स्वास्थ्य शाखाके विरेन्द्र सापकोटा बटैलै । सरकारी अस्पतालमे सरकार सिकलसेल रोगके निशुल्क चेकजाँच ओ एक लाखके औषधी डेना घोषणा करले बा ।
सुदूरपश्चिम प्रदेशके सेती प्रादेशिक अस्पतालमे यिहीसे पहिले निःशुल्क जाँच परिक्षण कैटी आइलमे आर्थिक स्रोत घटल कहटी अब्बे परिक्षणके लाग एक हजार रुप्या शुल्क टोक्ले बा । सिकलसेल जाँच महंगा हुइलपाछे न्यून आर्थिक स्रोत रहल परिवारके विमारीहुक्रनहे परिक्षण कैना कर्रा हुइल बा ।
सुदूरपश्चिम प्रादेशिक स्वास्थ्य निर्देशनालयके तथ्याङक अनुसार सेती अस्पतालमे ८ सय ३६, घोडाघोडी अस्पतालमे ३ सय ६१, टिकापुर अस्पतालमे १ जाने करके कैलालीमे १ हजार १ सय ९८ जाने सिकलसेल एनेमियाके बिरामी फेला परल बटै । कञ्चनपुरके महाकाली अस्पतालमे ८ जाने करके सुदूरपश्चिम प्रदेशभर १ हजार २ सय ६ जाने बिरामी फेला परल बटै ।
