कैलारीके तीन वडामे किटनाशक झुल वितरण
पहुरा समाचारदाता
हसुलिया, ४ बैशाख । मानविय सेवामा अनेकौ प्रयास धनगढी–५ कैलालीसे कैलारीके तीन ठो वडामे किटनाशक झुल वितरण करले बा ।
कैलारी गाउँपालिकाके सहकार्यमे वडा १, ३ ओ ४ मे किटनाशक झुल वितरण करल हो । वडा नम्बर ४ के गाउँसे सुरुवाट झुल वितरण कार्यक्रममे वडका पहुना गाउँपालिका अध्यक्ष राजसमझ चौधरी ओ विशिष्ट पहुना वडा नम्बर ४ के वडा अध्यक्ष ठागुराम चौधरी रहिट ।
गाउँपालिका अध्यक्ष राजसमझ चौधरी अब्बे गर्मी महिना सुरुवाटसंगे मच्छरके समय आइल ओरसे झुलके सही सदुपयोग करलेसे मच्छरसे लग्ना रोगसे बाँचे सेक्ना बटैलै ।
गैल बरष मच्छरसे लग्ना मलेरिया रोग ढेर देखल ओरसे यिहीसे बाँचेक लाग अब्बेसे सचेतना अपनैना आग्रह करलै ।
मानविय सेवामा अनेकौ प्रयासके अध्यक्ष भक्तराज जोशीके अध्यक्षतामे हुइल झुल वितरण कार्यक्रममे संस्थाके कोषाध्यक्ष मेघराज भट्ट, वडा नम्बरके वडा सदस्य लक्ष्मी चौधरी, हरिद्वारी चौधरी, गाउँक भल्मन्सा लगायतके सहभागिता रहे ।
मानविय सेवामा अनेकौ प्रयासके सिएआर–२२ परियोजना अन्र्तगत १५ सय घरघुरीके ४ हजार ५०५ ठो झुल वितरण करल बा । झुल वितरण सुकुम्बासी, विपन्न, दलित तथा एकल महिलाहुकनहे वितरण कैगिल बा ।
