अनुदानमे दुरुपयोग हुइटाः सांसद चौधरी
पहुरा समाचारदाता
काठमाडौं, ५ बैशाख । कैलाली–२ से निर्वाचित प्रतिनिधिसभा सदस्य सांसद अरुणकुमार चौधरी सरकारसे डेना कृषि अनुदानमे हुइना विकृतिके अन्त्य हुई पर्ना जरुरी रहल बटैले बटै ।
मंगरके रोज संसदमे बोल्टी चौधरी झोलामे कृषि कैना ओ कागजी प्रक्रिया केल पुगाके अनुदान लेना प्रवृत्ति डेखल बटैलै ।
आज हमार देशके कृषि उत्पादन हेर्ना हो कलेसे यहाँ उत्पादिन वस्तुसे हम्रहिनहे तीन महिनाफे पुग्न अवस्था नइहो,’ सांसद चौधरी कहलै, ‘कुषिमे सरकारसे लगानीफे करले बा । अनुदानफे डेले बा । मने ओकर दुरुपयोग हुइटी रहल बा ।’
झोले कृषकके कारण वास्तविक कृषक मर्कामे परल उहाँ स्पष्ट परलै । सांसद चौधरी कहलै, ‘झोलामे खेती कैना कागजी प्रक्रिया मिलाके डरुइयासे अनुदान पैठै । मने जे वास्तविक किसान हो । जे पाई पर्ना हो उ अनुदान नइपाइठ । यैसिन प्रवृत्तिके अन्त्य करे परठ ।’
ओस्टेक सांसद चौधरी सरकारी नियम, कानुन ओ प्रक्रियाके कारण विकासमे ढिलासुस्ती हुइना करल उदारहण पेस करलै ।
अब्बे हमार देशके विकासके प्रक्रिया कैसिक आघे बह्रल बा कहिके हेर्न कैलाली क्षेत्र नम्बर २ अन्तरगत कर्णाली चिसापानीसे गुइनी हुइटी सडकखण्डमे डेखल बा । मै पिटेहस करम टै रुइयहस कर, उहाँ कहलै, ‘स्तरउन्नतीके लाग उ क्षेत्रमे बजेट विनियोजन हुके टेण्डर आव्हान हुसेकल बा । मने, वनक्षेत्र पर्ना हुइल ओरसे कुछ रुखुवा काटे पर्ना रहे रुखुवा काटे नइपाके काम रुकल बा ।’
सरकारी नियमसे विकासके काम रोक्ना दुखद हुइल बटैटी उहाँ तत्काल यी समस्या समाधान करके काम सुरु करैना पहल कैना वन मन्त्रालय, डिभिजन वन कार्यालय ओ सरकारके ध्यानाकर्षण करैलै ।
