शिक्षाके गुणस्तरमे ध्यान दिः डा. आरजु राणा देउवा
पहुरा समाचारदाता
धनगढी,५ बैशाख । नेपाली कांग्रेसके केन्द्रीय सदस्य एवं संघीय सांसद डा. आरजु राणा देउवा अब सरकारी विद्यालयके गुणस्तरमे ध्यान डेहे पर्ना बटैले बटै ।
मंगरके रोज धनगढी उपमहानगरपालिका–८ मे निर्माण हुइल धनगढी नमुना माविके तीन तले विद्यालय भवनके उदघाटन करटी उहाँ संख्यात्मकरुपमे ढेर शैक्षिक जनशक्ति उत्पादन हुइलेसेफे गुणस्तरमे कमी हुइल कारण नेपालमे वेरोजगारी समस्या बह्रल बटैली ।
नेतृ देउवा शिक्षामे संख्यात्मक विकाससंगसंगे गुणात्मक विकासमे जोड डेना विद्यालयहे आग्रह करली । उहाँ भौतिक संरचना विद्यालयके लाग पहिल आवश्यकता रहल ओ उ पूरा हुइलपाछे पढाईमे गुणस्तर कायम करे पर्ना बटैली ।
धनगढी नमुना माविके ३६ कोठा भवन ६ करोड ८ लाख ३० हजार २७० रुप्यामे निर्माण हुइल हो । उ विद्यालयके संघीय सरकारसे ३ करोड ७७ लाख ९७ हजार १२६ ओ उपमहानगरपालिकाके २ करोड ३० लाख ३३ हजार १४४ रुप्यामे निर्माण सम्पन्न हुइल उपमहानगरपलिका जनैले बा । सांसद देउवा विद्यालयके भवन निर्माण हुइलमे खुशी व्यक्त करटी थप स्रोत साधन जुटैना पहल कैना बटैली ।
ओस्टेक करके मंगरके रोज नेपाली काँग्रेसके नेतृ देउवा कैलालीके निर्वाचन क्षेत्र नम्बर ५ अन्तरगतके ठप दुई परियोजनाके उदघाटन करले बटी । उहाँ संघीय सरकार ओ धनगढी उपमहानगरपालिकाके आर्थिक लगानीमे निर्माण हुइल तीन परियोजनाके उदघाटन करल रहिट ।
धनगढी उपमहानगरपालिकाके अपने लगानीमे धनगढी ८ स्थित धनगढी गाउँमे निर्माण हुइल तौलाहा ताल संरक्षण पूर्वाधार निर्माणके उदघाटन करले बटी । यी तालके लागत २ करोड ३४ लाख ८५ हजार ५१५ रुप्यामे निम्जल हुइल हो ।
ओस्टेक करके बेहडाबाबा मन्दिर परिसरमे निर्माण हुइल ढुंगाके बेससंगे इटाके पर्खाल ओ ब्लक निर्माण कार्यक्रमकेफे उदघाटन नेतृ देउवा करले बटी । ३ करोड ९४ लाख ३ हजार ८७१ रुप्या लागत खर्च हुइलमे संघीय सरकारके २ करोड ५७ लाख ३३ हजार ७२२ ओ उपमहानगरपालिकाके १ करोड ३६ लाख ७० हजार १९५ रुप्या लगानी रहल उपमहानगरपालिका बेहडाबाबा संरचना तयार हुइल हो । उदघाटन कार्यक्रममे संघीय सांसद डिल्लीराज पन्त, सुदूरपश्चिम प्रदेशके भौतिक पूर्वाधार मन्त्री प्रकाशबहादुर देउवा, प्रदेश सांसद रमेश धामी ओ मेयर गोपाल हमाल लगायतके उपस्थिति रहल रहे ।
