समयमे काम सेक्ना टोलीसे निर्देशन

पहुरा समाचारदाता
हसलिया, ६ बैशाख । कैलारी गाउँपालिकामे टमान वडामे संचालन हुइल योजनाके गाउँपालिकास्तरीय अनुगमन टोलीसे बुधके रोज अनुगमन कैगिल बा ।

गाउँपालिका स्तरीय अनुगमन टोलीसे संयोजक तथा कैलारी गाउँपालिकाके उपाध्यक्ष भगवतीकुमारी चौधरीके नेतृत्वमे वडा नम्बर २, ३, ४, ६ ओ ८ मे संचालन हुइल टमान योजनाके अनुगमन कैगिल हो । अनुगमन टोलीसे वडा नम्बर ४ स्थित श्री जनकल्याण माविके भवन मर्मतके अनुगमन करले बा । यहाँ ५० प्रतिशत काम सेकल बा । यम्ने जस्ताके पाता डरना बाँकी बा । यहाँ विद्यालय संचालन हुइना पहिले सम्पन्न कैना अनुगमन टोलीसे सुझाव डेहल अनुगमन टोलीसे संयोजक भगवतीकुमारी चौधरी बटैली । यकर लाग पाँच लाख बजेट विनियोजन कैगिल रहे ।

ओस्टेक नम्बर ४ स्थित श्री जनकल्याण माविके भवन निर्माणके अनुगमन करल बा । यहाँ भवन निर्माण सम्पन्न हुइल बा मने झयाल, ढोकाके पल्ला लगैना, डेस्क बेन्च बनैना बाँकी रहल बा । यिहीहेफे विद्यालय संचालन आघे काम पुरा निर्देशन डेहल उहाँ जनैली । यकर लाग २० लाख बजेट विनियोजन कैगिल रहे । वडा नम्बर ४ स्थित देवनारायण चौधरीके घरसे न्यू यूवा सुन्दर शक्ति खेलमैदानसम सडक स्तरोन्नतीके अनुगमन कैगिल बा । १५ लाख रुप्या बजेट विनियोजित यी आयोजनाके काम सम्पन्न हुइल उहाँ जनैली ।

वडा नम्बर ६ अन्र्तगत प्रधानमन्त्री रोजगार कार्यक्रम अन्र्तगत तेजराज चौधरीके घरसे चुनीलाल चौधरीके खेतुवासम ४ लाख ४० हजार ४५२ रुप्या बजेटमे डगर मर्मत काम जारी रहल बा । बाधा अवरोध नइहुइलेसे समय काम सेक्ना लक्ष्य लेके काम हुइटी रहल बा ।

वडा नम्बर ८ अन्र्तगत प्रधानमन्त्री रोजगार कार्यक्रम अन्र्तगत दुधिया गाउँसे हाटखोली टोलसम डगर निर्माण तथा मर्मतके काम हुइटी रहल बा । यकर बजेट ७ लाख ५५ हजार २४६ रुप्या बजेटमे यकर काम हुइटी रहल योजना शाखाके प्रमुख सन्तोषकुमार चौधरी बटैलै । यहाँ डगरमे ढुङगा, गिट्टी, बालुके धारल घर निर्माण हुइटी रहल ओरसे काम कैना समस्या रहे । सडकमे धारल बस्तुहे हाली हटैना निर्देशनसहित अनुगमन टोलीसे सहजीकरण करले बा । यकर काम ४० प्रतिशत पुरा हुइल उहाँ बटैलै ।

वडा नम्बर २ वडका मुडा हेमन्त चौधरीके घरसे रानामुडा झोलुङगे पुलके नहरसम सडक निर्माण तथा मर्मतके काम अनुगमन कैगिल बा । यकर बजेट ७ लाख ७२ हजार ३०२ रुप्या रहे । यहाँ ४० प्रतिशत काम हुइल बा । अनुगमन टोलीसे हाली काम कैना सुझाव डेहल बा ।

वडा नम्बर २ के प्रधानमन्त्री रोजगार कार्यक्रम अन्र्तगत बेझुराम चौधरीके घरसे रानामुडासमके डगर निर्माण तथा मर्मतके काम ४५ प्रतिशत काम हुइल बा । यकर लाग ४ लाख ४४ हजार ६६९ रुप्या बजेट विनियोजन करल रहे । यहाँ चाही कुलुवाके ढोका बन्द कैल कारण काम कैना समस्या हुइल रहे । वडा अध्यक्षहे समन्वय कैके ढोका खुलाके काम आघे बह्रैना सुझाव डेहल बा ।

ओस्टेक राष्ट्रपति सुधार कार्यक्रम अन्र्तगत कैलारी गाउँपालिका वडा नम्बर ८ पृथ्वीपुरस्थित ४५ लाख बजेटमे निर्माण हुइटी रहल विद्यालय भवनके अनुगमन कैगिल बा । यहाँ पिल्लर ओ जगसमके काम सेकल बा । उहे ठाउँमे पाँच लाख गेट निर्माणके बजेट विनियोजन हुइलमे तत्काल काम आघे बह्रना सुझाव डेहल बा ।

अनुगमन टोलीमे गाउँपालिका स्तरीय अनुगमन टोलीसे संयोजक तथा कैलारी गाउँपालिकाके उपाध्यक्ष भगवतीकुमारी चौधरी, योजना शाखा प्रमुख सन्तोषकुमार चौधरी, पूर्वाधार विकास समिति संयोजक तथा वडा नम्बर ६ के अध्यक्ष प्रेमबहादुर चौधरी, टोली सदस्य सुनिला चौधरी, प्रधानमन्त्री स्वरोजगार सहायक इन्द्रश्याम चौधरी, प्राविधिक रविशंकर चौधरी, प्रधानमन्त्री रोजगारके रन्जित कठरियालगायतके सहभागिता रहल रहे ।