नगरप्रमुख रावतसे अपन छोराहे सामुदायिक विद्यालयमे भर्ना

पहुरा समाचारदाता
सुखड, ७ वैशाख । घोडाघोडी नगरपालिकाके नगरप्रमुख खडकबहादुर रावत अपन छावाहे सरकारी विद्यालयमे भर्ना करले बटैं । वडा नम्बर १० पहलमानपुरमे रहल कान्तिराज्यलक्ष्मी माध्यामिक विद्यालयमे उहाँ छावाहे भर्ना करले बटैं ।

देशभर विद्यार्थी भर्ना अभियान चलल बेला नगरप्रमुख रावत स्वयं विद्यालय पुगके छावाहे विद्यालयमे भर्ना करले रहिट ।
छावक जन्म दिनके अवसरमे उहाँ बाल विकासमे भर्ना करले बटैं । छावक भर्नासँगे विद्यालयके ओरसे नयाँ पाठ्यपुस्तक हस्तान्तरण करले रहैं । सामुदायिक विद्यालयमे शैक्षिक गुणस्तर सुधार करेक लाग शिक्षक, सरकारी कर्मचारीहुक्रे ओ जनप्रतिनिधिहुक्रे अनिवार्य रुपमे सामुदायिक विद्यालयमे छावाछाइ पह्राइपरना विषय चर्चा पैटिरहल बेला नगरप्रमुख रावत अपन छावाहे सामुदायिक विद्यालयमे भर्ना करैले बटैं ।

सामुदायिक विद्यालयमे नेता, सरकारी कर्मचारी तथा शिक्षकहुक्रे अपन छावाछाइ भर्ना नैकरटसम गुणस्तर वृद्धि नैहुइना उहाँ बटैलैं । सामुदायिक विद्यालयके शिक्षा गुणस्तरीय बनैना भर्ना अभियानमे सहयोग करना उल्लेख करटि शिक्षक, कर्मचारीलगायत उच्च ओहोदाके व्यक्तिहुक्रे अनिवार्य रुपमे अपन बालबालिकाहे सरकारी विद्यालयमे भर्ना करैना उहाँ अनुरोध समेत करले बटैं ।

विद्यालयके गुणस्तर सुधार करना नगर सरकार प्रतिबद्ध रहल ओ यम्ने सबके सहयोग आवश्यक रहल उहाँ बटैलैं । नगरप्रमुख रावत कान्तिराज्यलक्ष्मी माध्यामिक विद्यालयके व्यवस्थापन समितिके अध्यक्ष समेत हुइटैं । उहाँक छावा आयुश रावत ३ वर्ष पुरा कैके ४ वर्षमे प्रवेश करले बटैं ।