मुक्त हलियाके मुद्दाहे राज्य ओ राजनीतिक दल गम्भीरता नइलेहलै ः सरोकारवाला निकाय
पहुरा समाचारदाता
धनगढी,११ बैशाख । मुक्तहलियाके मुद्दाहे राज्य ओ राजनितिक दलसे गम्भीरता साथ नइलेहल कारण समस्या अभिन ज्यू के त्यू रहल एक कार्यक्रमके सहभागिहुक्रे बटैले बटै ।
राष्ट्रिय मुक्तहलिया समाज महासंघ नेपालके आयोजनामे ‘मुक्त हलिया सशक्तीकरण परियोजना (अधिकार) अन्र्तगत राजनीतिक दल ओ स्थानीय सरकारमे लक्षित वर्गके सहभागिता, समावेशिता विषयक प्रदेश स्तरीय सवाद कार्यक्रमके सहभागि उ बाट बत्वाइट रहिट ।
कार्यक्रममे मुक्तहलिया अभियन्ता संविधानसभा सदस्य हरिश्रीपाइली २० बरस पहिलेसे हलियामे मुद्दा उठाइल मने राज्य ओ मुख्य राजनीतिक दलसे यिहीहे गम्भीरता पूर्वक नइलेहल बटैलै । राष्ट्रिय अपाङता महासंघ प्रदेश महासचिव नन्दराज भट्ट मुक्त हलिया, कमैया, कम्लरी, अपाङता रहल व्यक्तिके लाग बजेट कार्यान्वयनमे नइआइल बटैलै । इन्सेक प्रदेश कार्यालयके प्रलेख अधिकृत कृष्ण विक सामाजिक मुद्दामे राजनितिक दलके काम करे छोरलपाछे जनताके विश्वास गुम्टी गैल बटैलै ।
नेपाल राष्ट्रिय दलित समाज कल्याण संघके अध्यक्ष चक्र विक विभेद मुक्त ओ समावेशिताके नारा पानामे सिमित रहल बटैले बटै ।
कार्यक्रममे प्रदेशसभा सदस्य रमेश धामी हलिया, मुक्त कमैया, कमलरीमे मुद्दामे अपने पहल कैना बटैलै । ओस्टेक कार्यक्रममे नेपाली काँग्रेस पार्टीके प्रदेश सदस्य पुष्प भट्ट, नेकपा एकिकृत समाजवादी पार्टीके दिर्घराज जोशी आ अपन पार्टीसे मुक्त हलियाके सवालमे लविङ कैना प्रतिवद्ध जनैलै ।
कार्यक्रममे सुदूरपश्चिम प्रदेश सरकारके मुक्त न्यायधिवक्ता कुलानन्द उपाध्याय सुदूरपश्चिम प्रदेशके स्थानीय तह ओ प्रदेश सभामे ओ राजनितिक समावेशी सहभागिताके स्थितिबारे कार्यपत्र प्रस्तुत करल रहिट ।
राष्ट्रिय मुक्तहलिया समाज महासंघ नेपालके अध्यक्ष इश्वर सुनारके अध्यक्षतामे हुइल कार्यक्रमके संचालन महासंघके कार्यकारी निर्देशक हरिसिंह बोहरा करले रहिट ।
