बसन्ता वन क्षेत्रके अतिक्रमण हटैना एक हप्ते अल्टिमेटम

पहुरा समाचारदाता
धनगढी, १२ बैशाख । कैलाली जिल्ला कैलारी गाउँपालिकामे पर्ना बसन्ता बन क्षेत्रके अतिक्रमण हटैना डिभिजन वन कार्यालय बसन्तासे एक हप्ते अल्टिमेटम डेले बा ।

डिभिजन वन कार्यालयसे सोम्मारके रोज सार्वजनिक सूचना जारी करटी कैलारी गाउँपालिका वडा नम्बर ५ मे हुइल बन अतिक्रमण हटैना एक हप्ताके समयसीम डेहल हो । डिभिजन वन कार्यालय बसन्ताके प्रमुख श्याम सुन्दर माझीके अनुसार कैलारी गाउँपालिका वडा नम्बर ५ मे पर्ना पवेरा सामुदायिक वन (पुरुव ओर बुटकिहुवा ताल, पश्चिममे बन्दरगौरही गाउँ, उत्तरमे लालबालु भुस्कीहुवा सामुदायिक वन ओ दक्षिणमे मनकामना प्रथामिक विद्यालय) चार किल्ला क्षेत्रमे अतिक्रमण करके घर टहरा बन्टी रहल ओरसे बनसेकल सक्कु घर टहरा हटैना जनागिल बा ।

ओस्टेक करके बैजपुरके प्रतिक्षालयके उत्तरपट्टी कटैनी लडियाके पुलके दक्षिण पट्टीके ओ हुलाकी सडकखण्डके छेउके अतिक्रमण हटैना सात दिने अल्टीमेटम डेहल डिभिजन वन कार्यालय बसन्ताके प्रमुख माझी बटैलै ।
तोकल समयमे घर टहरा नइहटैलेसे वलपूर्वक स्थानीय प्रशासनके सहयोगमे घर टहरा हटैना ओ आटेर कैना घरधनी ओ व्यवसायीहुकनहे वन ऐन २०७६ बमोजिम कार्वाही कैना जानकरी करैले बटै ।