महिलाहुकनके लेङगा सिल्ना तालिम

पहुरा समाचारदाता
धनगढी, १२ वैशाख । परम्परागत पहिरन जोगेनाके साथे व्यावसयिकतामे जोड डेटी आयस्रोतमे बृद्धिके लाग महिलाहुकनहे ४५ दिने लेङगा सिल्ना तालिम डेहल बा ।

व्यावसयिक तथा सीप विकास तालिम केन्द्र सुदूरपश्चिम प्रदेश ओ धनगढी उपमहानगरपालिका वडा नम्बर ८ के कार्यालयके सहकार्य ४५ दिने लेङगा सिल्ना तालिम डेहल हो । उ तालिमके समापन कार्यक्रम सोम्मारके रोज धनगढी उपमहानगरपालिका वडा नम्बर ८ के वडा अध्यक्ष जुगराम चौधरीके अध्यक्षतामे हुइल रहे ।

कार्यक्रममे बोल्टी उहाँ वडा नम्बर ८ मे यी बरस एकठो केल सीपमुलक तालिम प्रदान करे मने अइना बजेटसे माग अनुसारके तालिमके व्यवस्था कैना प्रतिवद्धता जनैले बटै । उहाँ कहलै, ‘महिलाहुकनहे लेंङगा बनैना तालिम देहल बा । यरक सदुपयोग करके व्यावसायिक ओर लैजैना आग्रह बा ।’ कार्यक्रममे व्यावसयिक तथा सीप विकास तालिम केन्द्र सुदूरपश्चिम प्रदेशके प्रमुख भुवन पन्त लेङगा तालिमसे पहिरन जोग्नाके साथे पहिचान जोग्ना बटैलै ।

थारु समुदायके बडघर, भल्मन्सा प्रथा यी थारु समुदायके पहिचान हो ।,‘उहाँ कहलै, थारु महिलाहुकन यी तालिमसे पहिचान जोग्नाके साथे आयस्तरमे बुद्धि करे सेक्जाई ।’ अइना दिनमे ठप सीपमुलक तालिमके आयोजना कैना उहाँ बटैलै ।

तालिम समापन कार्यक्रममे पहुरा दैनिकके सम्पादक प्रेम चौधरी, तालिम लेहुइया मन्से गिता चौधरी ओ रिता चौधरी मन्तव्य व्यक्त करटी चोलिया सिल्ना तालिमकेफे व्यवस्था कैना माग करल रहिट । ४५ दिने लेङगा सिल्ना तालिमके प्रशिक्षक रुपा चौधरी डेहल रही । तालिम समापन कार्यक्रमके संचालन नन्दलाल चौधरी करल रहिट । तालिम समापन कार्यक्रममे व्यावसयिक तथा सीप विकास तालिम केन्द्रके प्र.स झेपेन्द्र अधिकारीकेफे उपस्थिति रहे ।