प्रदेश स्तरीय राष्ट्रपति कपमे विजयीहे पुरुस्कार हस्तान्तरण
पहुरा समाचारदाता
धनगढी, १३ बैशाख । १३ औँ सुदूरपश्चिम प्रदेश स्तरीय राष्ट्रपति रनिङ शिल्ड प्रतियोगितामे प्रथम हुइल कैलालीहे ट्रफि ओ नगद पुरुस्कार हस्तान्तरण करल बा ।
सुदूरपश्चिम खेलकुद परिषदके सदस्य सचिव दिपकबहादुर सिंहसे एक कार्यक्रम विच कैलालीके अध्यक्ष ललित खत्रीहे ट्रफि ओ २५ हजार हस्तान्तरण करल हुइट । सुदूरपश्चिमके टमान जिल्लामे हुइल खेलमे कैलालीसे २७ स्वर्ण, १२ रजत, ७ कास्य करके ४७ पदक हात पारल रहे । ट्रफि बुझ्टी कैलाली जिल्ला अध्यक्ष खत्री खेलाडीके मेहनत ओ लगनशीलतासे पहिल हुइल बटैलै ।
खेलाडी उप्पर हुइना राजनितिके कारण विगतके बर्षमे कम मेडल पैना करल बटैटी उहाँ अबके दिनमे खेलकुदमे राजनीति बन्द कैना बटैलै । सदस्य सचिव सिहसे सुदूरपश्चिमके खेलकुद विकासके लाग सदा लग्टी रहना प्रतिवद्धता व्यक्त करलै ।
सुदूरपश्चिम खेलाडी उत्पादन कैना उर्वर भुमि रहल बटैटी उहाँ देशहे खेलकुद सुदूरपश्चिमसे धानल बटैलै । ओस्टेक प्रतियोगिमे दुसरा हुइना कञ्चनपुर ओ टिसरा हुइल डडेल्धुराहेफे ट्रफि ओ नगद पुरस्कार हस्तान्तरण करले बा ।
ट्रफिसगे कञ्चनपुरसे नगद १५ हजार ओ डडल्धुरासे नगद १० हजार प्रदान करल हो । कञ्चनपुरसे १० स्वर्ण, १४ रजत, १० कास्य करके ३४ पदक हात परटी दुसरा हुइल रहे कलेसे डडेल्धुरा ४ स्वर्ण, ८ रजत, ९ कास्य करके २१ पदक हात पारल रहे ।
