९५३ मुक्तकमैया परिवार पुनर्स्थाना हुइना बाँकी
पहुरा समाचारदाता
धनगढी, १४ बैशाख । सुदूरपश्चिम पदेशमे ९५३ मुक्त कमैया परिवार पुनर्स्थाना हुइना बाँकी रहल बाटै ।
मुक्त कमैया समाज केन्द्रीय समितिके तथ्यांक अनुसार उ संख्यामे मुक्त कमैया पुनर्स्थाना हुइना बाँकी रहल डेखाइल हो । नेपाल सरकारसे २०५७ साउन २ गते कमैया मुक्तिके घोषणा तथा २०७० असार १३ गते कमलरी मुक्तिके घोषणा करल रहे ।
कमैया मुक्तिके दुइ दशकसे ढेर समय हुइलेसे फेन आभिन फेन कमैयाहुक्रनके पुनर्स्थाना हुइ नैसेकल केन्द्रीय अध्यक्ष चौधरी दुखेसो पोख्लै । कौनो फेन सरकार तदारुकताके साथ काम नैकरल ओरसे मुक्त कमैयाहुक्रनके पुनस्र्थापना हुइना बाँकी रहल अध्यक्ष चौधरी बटैलै ।
यहोर कमैया मुक्ति हुइलपाछे २७ हजार २१ मुक्त कमैया परिवारहे पुनस्र्थापित करल बा जेम्ने सुदूरपश्चिम प्रदेशमे १२ हजार ९२४ मुक्त कमैया परिवार पुनर्स्थाना हुइल बाटै ।
ओस्टके कैलाली ओ कञ्चनपुर जिल्लाके ५२९ परिवार अनुचित जग्गा पाइल ओरसे ओइनके सट्टा भर्ना कैना बाँकी रहल जनाइल बा । ओस्टके कैलालीके १७३ कमैया परिवारके परिचय पत्र बदर होके पुनस्र्थापना प्याकेजसे वञ्चित रहल जनाइल बा कलेसे ३८० परिवार परिचय पत्र पाके फेन जग्गा प्राप्त करे नैसेकल जनाइल बा ।
ओस्टके भूमि व्यवस्था, सहकारी तथा गरिवी निवारण मन्त्रालयके तथ्यांक अनुसार सुदूरपश्चिम प्रदेशमे ३ हजार ५०८ कमलरीके तथ्यांक लेहल रहे उमध्ये १ हजार १५८ जाने किल परिचय पत्र पाइल डेखजाइठ् ।
भूमि व्यवस्था सहकारी तथा गरिबी निवारण मन्त्रालयके २०७५/७६ के तथ्यांक अनुसार कैलाली ओ कञ्चनपुरके २ हजार ३५० कमलरी परिचय पत्र पैना बाँकी रहल डेखाइल बा ।
