यौन दुव्र्यवहारके घटनाप्रति गम्भीर ध्यानाकर्षण
पहुरा समाचारदाता
धनगढी, १४ बैशाख । कैलाली जिल्ला धनगढी उप महानगरपालिकामे रहल एसपीए. कलेजमे अध्यापन करटी आइल एक शिक्षकसे कलेजमे अध्यननरत छात्राहुकनउप्पर करल यौन दुव्र्यवहारके घटनाप्रति टमान संघ संस्थाके गम्भीर ध्यानाकर्षण हुइल बा ।
उ संघसंस्थासे धनगढी उपमहानगरपालिकाके उपप्रमुख कन्दकलाकुमारी राना ओ प्रहरी नायव उपरीक्षक कुलदिप चन्दहे ध्यानाकर्षण पत्र बुझैले बा ।
उ कलेजमे अध्ययनरत छात्राहुकनउप्पर अश्लिल शब्द प्रयोग कैना, रातके समयमे भिडियो कल करके अनुहार डेखैना दबाव डेना, फोन करके कोठामे बोलैना नइगैलेसे उहे बाटहे जोरके कक्षामे तनाब डेना, अपने कहल बमोजिम नइकरलेसे परीक्षामे नम्बर कम डेना, जैसिन कार्य करके बारबार यौन दुव्र्यवहार करल घटनाप्रति मानव अधिकारके क्षेत्रमे काम कैना संघसे गम्भीर ध्यानाकर्षण हुइल जनैले बा ।
यी घटनासे बालिका तथा किशोरीके सुरक्षित, सम्मानित ओ स्वतन्त्रता पुर्वक बाँच्न अधिकारके खण्डित करल कहल बा । घटनाके सत्य, तथ्य छानविन करके घटनामे संलग्न दोषीहे कडासे कडा कारवाही, प्रभावित बालिकाके सुरक्षाके सुनिश्चितताके लाग महिला मानव अधिकार रक्षक सञ्जाल लगायतके मानव अधिकारके क्षेत्रमे काम कैना संघ संस्थासे जोडदार माग करले बा ।
