अपाङगता हुइल व्यक्तिनसे लेहल ढेर यातायात भाडा फिर्ता कैना प्रशासनसे निर्देशन

पहुरा समाचारदाता
धनगढी, १४ बैशाख । अपाङगता हुइल व्यक्तिनसे लेहल ढेर यातायात भाडा फिर्ता कैना जिल्ला प्रशासन कार्यालय कैलाली निर्देशन डेले बा ।

सुन्दर सुदूरपश्चिम यातायात प्रालि, रिभर साइड प्रालि लम्की ओ उग्रतारा डडेल्धुरा सार्वजनिक यातायात प्रालि शाखा धनगढीहे पत्र पठैटी अपाङता रहल व्यक्ति कानून बमोजिम पाई पर्ना सुविधा नइडेके ढेर भाडा लेना यी यातायात प्रालिसे सम्बन्धित सार्वजनिक बसहे ढेर लेहल भाडा सम्बन्धित व्यक्तिनहे फिर्ता डेहे ओकर जानकारी जिल्ला प्रशासन कार्यालय कैलालीहे करैना आदेश करल बा ।

राष्ट्रिय अपाङगता महासंघ नेपाल सुदूरपश्चिम प्रदेश कार्यालय धनगढी कैलालीके चलानी नम्बर १३९/२०७९/०८० मिति २०७९/१०/१७ गतेके प्राप्त पत्रानुसार उ यातायात प्रालिसे संचालित सार्वजनिक बससे अपाङता रहल नागरिकसे सार्वजनिक यातायातमे यात्र करेबेर अपाङता रहल व्यक्तिहुकनके अधिकार सम्बन्धी ऐन २०७४ के दफा २ ओ सार्वजनिक सवारी तथा यातायात व्यवस्था ऐन २०४९के दफा १०७ के उपदफा १ मे रहल व्यवस्था विपरित अपाङता हुइल नागरिकहुकनस चर्को भाडा असुल्ना ओ असम्मानित व्यवहार समेत कैना करल ओरसे आवश्यक करवाही करी पाउँ कहिके जिल्ला प्रशासन कार्यालय कैलालीमे उजुरी दर्ता हुइल प्रशासकीय अधिकृत शिवराज जोशी बटैलै ।